396
Nce può mettere pure lo pesce, o l'alice fresche scaudate, e spollecate, ca veneno chiù meglio.
Piglia miezo ruotolo de sciore fino, miezo quarto de zuccaro scuro, miezo quarto de nzogna, quatt'ova, no poco de sale, e no pocorillo d acqua fresca, e mpastarraje ogne ncosa; fatta la pasta ne stiennarraje na pettola co lo laniaturo, e farraje tanta pezzelle no poco chiù peccerelle de chelle de li cauzuncielli de coppa, e li mbottune, ncioè, se li buò fa co caso, e ova sbattute doce, nce miette no poco de zuccaro, o pure li può fa pure de recotta co zuccaro, e rossa d'ova; si po li buò fà de sceroppata, nce miette l'amarene, o la percocata, li chiudi buoni, e li friarraje.
Farraje la stessa pasta comm'a li cauzuncielli de coppa co lo zuccaro; piglia lo ruoto che t'abbesogna nce farraje na sodonta de nzogna, e po nce miette la pettola de pasta che schianarraje co lo laniaturo; pe mbottunatura nce miette chello stesso che t'aggio ditto ncoppa, mperò de caso, e ova, mozzarelle, e presutto, nce miette l'auta pettola, la chiude bona attuorno, e ncoppa a essa nce farraje pure na sodognuta de nzogna, e la farraje cocere a lo furno, o co lo tiesto.
Piglia miezo ruotolo de sciore fino (ma chello
