Paggena:Cucina teorico-pratica.djvu/403

'A Wikisource.
Jump to navigation Jump to search
Chesta paggena è stata leggiuta.
395


Sauza verde.

Piglia doje grana d'amenta, e petrosino, lo lave, lo spriemme, e dinto a lo mortaro lo pise fino fino, piglia la mollica de pane de na pagnotta, la spugne dint'a l'acito, e po nce la pise pure co chell'erva, nce miette lo sale, e lo pepe, e n'auto poco d'acito, facennola denza comme vuò. Si la vuò doce nce miette no poco de zuccaro.

REGOLA UNNECE.
PIATTE RUSTECH'E DOCE.
Cauzuncielli mbottunati, e fritti.

Piglia la pasta de llo ppane, e quanno è cresciuta la mine co no poco de nzogna, sale, e pepe; ne farraje tanta pezzelle tonne tonne, e ncoppa a na mmità nce miette caso, e ova sbattute, mozzarella, o provola ntretata o fellata, co pure presutto, o sopressata, si le bolisse de grasso, sale, e pepe e co l'auta mmità de pasta lli commogliarraje, astregnenno buono attuorno; e lli farraje fritti jun jun.

Cauzuncielli de scammaro fritti.

Volenno fa li cauzuncielli de scammaro, pigliarraje la stessa pasta, e de la stessa manera; piglia doje, o tre grana de scarole pulite, la vate, e ntretate lle farraje zoffritte, o co la nzogna, o co l'uoglio, nce miette alice salate ntretate, aulive senza l'osse, e chiapparielli, farraje zoffriere assieme, e co chesta rrobba mbottunarraje li cauzuncielli, e li friarraje.