Paggena:Cucina teorico-pratica.djvu/398

'A Wikisource.
Jump to navigation Jump to search
Chesta paggena è stata leggiuta.

390

l'accuonciarraje dint'a no ruoto co mollica de pane grattato arecheta sale, e pepe sott'e ncoppa, e na bona ogliata, e dint'a lo furno li farraje ncroscà.

REGOLA NOVE.
PIATTE D'OVA.
Porpette d'ova.

Piglia na pagnotta de pane la grattarraje co n'auto ttanto de caso grattato, sale, pepe, e petrosino ntretato, ne farraje na pasta de porpette co l'ova sbattute; ma che no sia molle, ne farraje tanta porpette nfarenannole dint'a lo sciore, e le farraje cocere, o dint'a la sauza de pommadore, o co lo brodo de pesce.

Ova jettate all'acqua.

Farraje vollere l'acqua dint'a na cazzarola co lo sale, e no poco d'acito janco, e quanno volle nce rumpe n'uovo a la vota, e lo farraje cocere, e a un'a uno lle farraje; cofromme se ne coce uno, lo lieve, e li miette dinto a lo vacile facennole scola tutta l'acqua, e ncoppa nce può menà la sauza de pommadore, na sauza de pesielle, e cepolluzze novelle, e cierti nce mettono purzi na scioriata de caso grattato.

Ova co la sauza.

Farraje l'ova toste comm'a chelle de Pasca, lle munne, e le taglie a quart'a quart, l'accuonce dint'a no vacile, e po nce mine na bella sauza speretosa, che farraje de chesta manera.