Paggena:Cucina teorico-pratica.djvu/384

'A Wikisource.
Chesta paggena è stata leggiuta du' vote e mo è fernuta.

376

Feletto de puorco arrostuto sano.

Farraje no feletto de puorco nfelato a lo spito, e si lo ncarte no faje male, pecchè chist’arrusto se piglia sempe tutto lo fummo, e quanno è ncartato nò nce stà sto pericolo.

De la stessa manera può fà pure l’arrusto de no feletto de vitella, o no feletto de dinto.

Gallottola a lo furno e arrostuta.

Piglia na bella gallottola, doppo spennata, e lavata da dinto, e da fora la mbottunarraje si la vuò fa accossì, de stivaletti, o de risi scaudati vierdi, vierdi, e acconciate co caso, e ova, e no poco de brodo de stufato, e po nce miette presutto ntretato, cervellate si n’è lo tiempo e si no sacicce secche vollute, la mbottune primma da sotto, e la cuse, e po pe coppa da donne n’aje levata la vozzola, e la cuse, e po, o la faje ncoppa a la gratiglia, o dint’a no ruoto lardiata de nzogna a lo furno che vene accellente.

De chesta stessa manera può fà pure li cosciette de piecoro a lo furno, e qualunque auta carne.

REGOLA CINCO.
PIATTE DE CACCIA.
Puorco sarvateco nseviero.

Piglia lo presutto de lo puorco sarvateco, lo farraje piezze piezze, lo lave buono, lo farraje scolà, e po co no panno polito l’asciut, po lo miette dint’a na cazzarola, co la nzogna; e lo faje