Paggena:Cucina teorico-pratica.djvu/376

'A Wikisource.
Jump to navigation Jump to search
Chesta paggena è stata leggiuta du' vote e mo è fernuta.
368

rossa rossa, nce miette li pommadore si n'è lo tiempo, o pure nce miette la conserva de pommadore, e pure vuotarraje sempe abbagnanno co acqua; quanno la conserva, o pommadore se sonco tutte consumate allora nce miette l'acqua pe fa lo brodo; attiento compà, si lo brodo te serve sulo p'acconcià li maccarune, nce miettarraje acqua meno quanto sulo se coce la carne, si po lo brodo te servesse, o pe farence na zuppa, o pe nce cocere na menesta janca, allora nce miette chiù acqua, e chiù grasso pecchè si no lo brodo te vene sbaviato.

Si te venesse ncapo de fa pe stufato no bello lacierto va buono assaje, e chisto lo può fa pure mbottunato, facennoce no pertuso co lo cortiello pe mmiezo, e chillo pertuso lo mbottunarraje de passi, pignuoli, petrosino, majurana, no poco de lardo tutto ntretato, e si nce miette no poco de saciccio nce sta buono assai pecchè chesto cape quasi a ogne ncosa.

Carne d'agniello co la sauza de pommadore.

Piglia tre rotola de pommadore li taglie ncroce, e ne lieve li semmente, e chell'acquiccia, e li faje vollere, doppo li passarraje pe lo setaccio e chillo stratto llo mmiette dinto a no tiano o cazzarola, co no miezo quarto de nzogna, lo sale, e lo pepe, e po nce miette la carne d'agniello piez piez, pecchè accossì la sauza s'astregne, e la carne se coce, e te vene no bello piatto saporito, de la stessa manera, la può fa pure co li pesielle mperò senza li pummadore facenno zoffriere la carne e a meza cottura nce mine li pesielle, accussi la farraje cocere.