360
lo patto che fanno tutti li schiattamuorte de pagà li diebbiti loro a li pesielli, ncioè — Ad pisellos.
Piglia nzomma i pesielli janc' comme t'aggio ditto, e pe dudece perzune pigliarraje quattuordece rotola de pesielle (de chilli tienneri mperò) doppo che l'avrai monnati li lavarraje; po farraje zoffriere no terzo de nzogna co doje grana de cepolle novelle, spaccate a quart', a quart', e quanno le cepolle se sonc mez'arrossute nce mine li pesielli e accossì li farraje cocere votannoli sempe pe no farl'azzeccà sotto.
Li può cocere pure dinto a lo brodo de lo stufato, li può fa pure co lo caso e ova sbattute, e purzì co l'uoglio ca venene buon'assai.
Li può fa pure co la verrinia allattante a fellucce fellucce.
Chesta menesta se fa tale e quale comm'a li pesielli; mperò nce ne vonno chiù assaje.
Quanno avarraje monnate le fave, farraje zoffriere la nzogna dint'a no tiano co no poco de presutto ntretato, doppo nce mine le ffave, e quanno sonc'a meza cottura nce miette no poco d'acito no poco d'amenta lavata, e sfronnata, e le farraje feni de cocere.
Piglia chilli belli cocozzielli piccirilli, ne tagliarraje la cimma, e lo struppone, e lli ffarraje
