Comm’a l’ato… Mamma d’’o Carmene… Ah no, ’sta vota nun m’’a faccio arrubbà ’a figlia mia, ’o core mio, ’a vita mia… Lassai ’a fatica… nott’e juorne vicino ’o letticciullo suio. Passai nu mese…… Miedece, medicine, ghiaccio in continuazione, vennettemo ’nfì ’a lana d’’e liette.
Na sera ’o miedeco dice: Mbè, non dispero, chesta è n’ata ricetta: na specialità. Speditela da Lanciotti. Costava vinte lire… E manco nu soldo dint’a casa. ’A dieci iuorne magnavamo solo pane… ma chest’è niente… ’a medicina… ’a medicina… Scuraie notte, ascette, pe’ fa’ che? Nun ’o saccio. Ascette. Chesto sapevo che avev’’a turnà c’’a medecina. Che fece? Nun ’o saccio. Nun m’’o ricordo ’ncopp’’a Vergine santissima. Vedevo a Papeluccio muorto, vedevo a Nennella morta, quanta sciure, quanta sciure, nun ’o saccio. Ma è certo c’’a medicina ’a purtaie e Nennella mia campa, ride, me guarda… Perdunateme, cundannateme, ma Nennella mia è viva, è viva, è viva e me guarda. Nun me mporta ’o riesto… (cade sullo scranno ridendo e piangendo nello stesso tempo).
Nen. (vedendo piangere il padre si stacca dalla mamma e corre alla gabbia tendendo le braccia a Esp.) No papà… papà… non fa accussì…
Esp. (si scaglia verso lei, si accoccola, l’abbraccia attraverso l’inferriata, tenta baciarla, in faccia, le bacia le manine) Gioia… gioia… gioia mia.
P. M. Togliete quella marmottina di là…
1° giur. (al 2°) Teatralità…
2° giur. (accenna di sì e parla al 3°).
3° giur. Montature… (riprovando).
4° giur. (afferma col capo).
Un carab. (prende la piccina e tenta staccarla dal padre).
Nenn. (svicolandosi, gridando, piangendo) No… no… io voglio a papà… Papà… Papà…
Esp. (balzando come una belva alle sbarre che afferra e scuote furente, improvvisamente trasformato in aspetto feroce) Lass’’a ì… lass’’a ì santa Maronna o te sbramo!