Paggena:Circo equestre Sgueglia - Raffaele Viviani - 10 commedie.pdf/16

'A Wikisource.
Chesta paggena è stata leggiuta.
70

Raffaele Viviani


Nicolina (vien fuori dal terrazzino, scorge il clown) — Samue’.

Samuele (alza gli occhi) — Gué, gué…

Nicolina (prende il piatto e la tazza di caffè vuota dal tavolo) — Appena che ho finito, scendo, eh?

Samuele — Eh, eh! (Come dire, ironicamente: Il momento è buono!).

Nicolina — Me passe’[1] nu poco ’o salto murtale.

Don Ciccio — Lassa ’o sta’[2]… Lassa ’o sta’…

Nicolina — E pecche?

Don Ciccio — Chillo mo, Samuele, tene ’o mangia’ ’ncopp’’o stommaco.

Samuele (sardonico) — Famme digerì’ apprimma! (Don Ciccio spiega alla figlia quanto è accaduto).

Giannina (remissiva, al marito) — E allora?

Samuele — E allora, che?

Giannina — Mangiammo doppo ’o spettacolo?

Samuele (maggiormente turbato) — A mezanotte? (A Don Ciccio ed a Nicolina che ridono) È venuta ’a vigilia ’e Natale! (Giannina, indispettita, va a sventagliare il fornello).

Don Ciccio (alla figlia) — Mammeta[3] che sta facenno?

Nicolina — S’è menata nu poco ’ncopp’’o lietto. (Rientra nella «carovana»).

Giannina (seccata di sventagliare, al marito) — Ll’acqua se sta ’nfucanno… io vaco[4] nu mumento dinto… (Esce).

Samuele (levandosi di scatto) — Don Ciccio mio, nun ’a saccio capi’ cchiù! Nun ’a saccio capi’ cchiù! Me pigliarne[5] a schiaffe rò stesso! Ma comme: io mangio na vota ’o juorno[6] e tu (come parlando a Giannina) e ccinche miette a ’nfuca’ ll’acqua? (Don Ciccio va di nuovo appisolandosi. Samuele bagna il dito nell’acqua della pentola, per misurarne il grado di temperatura) Tutte quante hanno magnato o stanno magnanno! E io che magno? Veleno! (Sventaglia nervosamente sotto il fornello e parla a Don Ciccio, non accorgendosi che, ormai, il vecchio dorme) Si Giannina m’avesse vuluto cócere nu maccarone p’’ogne capriola che aggiu fatto… n’avarrie[7] avut’a truva’ na ’nzalatiera [8] accussi… (Con un gesto delle braccia la descrive enorme) E addo’ stanno? (Bagna di nuovo il dito, e sventola; ma infervorato nel suo dire non s’accorge che s’allontana dal fornello e sventaglia a vuoto) E sulo p’’o magna’? In tutto mi trascura, Don Ci’, in tutto… (Si avvicina di scatto al fornello, e sventaglia) È nu mese che le sto dicenno: Mietteme duie punte ’areto[9] ’o cuscialetto[10]. Chillo è a maglia: faticanno[11], se fernesce ’e sfi-

  1. Me passe: mi ripasso (per esercitarmi).
  2. Lassa ’o sta’: lascialo stare.
  3. Mammeta: tua madre.
  4. vaco: vado.
  5. pigliarne: prenderei.
  6. juorno: giorno.
  7. n’avarrie: ne avrei.
  8. nzalatiera: insalatiera.
  9. ’areto: dietro.
  10. cuscialetto: cosciale del pantalone da ginnastica.
  11. faticanno: lavorando.