SCENA IX.
Tommaso, poi Carminella, quindi Rosina vestita in grand’eleganza, con maschera e detti.
Tom. Zitto, zitto, diable! la signora ha inteso tutto: silans, silans.
Pul. (tra sê) (Io non me nce pozzo capacità!.)
Car. Viene madama.
Tutti. Madama!
Tim. Lasseme… (avanzandosi)
Pul. (arrestandolo) Addò t’accuoste?… Sette rana e mmiezo jesce fora.
Tom. (a Pul.) Silans.
(Esce Rosina, saluta a tutti con grazia, e siede ad una vistosa sedia d’appoggio.
Mau. (dice alla stessa sottovoce) (Rosì statte attiento, bada a non te fa cadè la maschera de coppa ca sinò se vede chella de morte che sta sotto.)
Ros. (Non ce penzà.)
Pan. (osservandola dice a Nicolino) E no bello piezzo de giovane!
Nic. Che bello personaggio che ttene!
Cic. Vi che ppiezzo de guaglione torzuta e auta a ccuollo! peccato che ttene la maschera nfaccia!
Ale. Timotè? che te nne pare?
Tim. E chi la lassa? po tenè la faccia de morte de viva ca non me ne mporta niente.
(Pan. e Nicolino si avvicinano.)
Mau. (li trattiene) Putiuselbac, putiuselbac.
Pan. (a Nic.) Che bò, lo ttabbacco?
Nic. (a Tommaso) Vo lo ttabacco rapè, o lliccese?