Pul. (tra sè) (Tutte hanno rialato, e cchillo spirito de violino (indica Timoteo) non m’ha dato niente. Io nce sto proprio corrivo!
Tim. (tra sè) (Si io non rigalo comme hanno fatto ll’aute, faccio na cattiva figura; tengo sette rana e miezo ncuollo, mo li mmetto dinto a na cartuscella e nce li ddò.) (esegue poi dice a Pulcinella) Monzù, favorite.
Pul. Mersì. (giubilando tra sè) (Oh comme pesa sta cartuscella! chisto ha dda essere no butto gruosso!)
Mau. (a Pul.) (Pulicenè, mo sarria lo tiempo de fa ascì a la fenta madama.)
Pul. (Mauri, allegramente, io aggio fatto no bello cuoppo!)
Mau. (Io aggio fatto na pezza pe na mano, e no tarì pe n’auta.)
Pul. (E io aggis fatto meza pezza pe na mano, e sto butto pe n’auta; guè pesa sà, cca nc’è rrobba assaje. (apre ed osserva) Lli mmalora! so ssette rana e mmiezo!) (a Timoteo) E tu mme miette minano, sette rana e mmiezo! jesce fora, jesce fora.
Cic. Ah, ah, ah!
Mau. (a Pul.) Silans.
Pul. Che silans lo cancaro che se lo roseca!.. La signora assicurava mille ducate a lo juorno ncoppa a ssette rana e mmiezo!
