Mau. Statte bona, gioja de Maurizio.
Pul. (Lo finale?)
Mar. Sìjeme fedele, e vvedarraje quanto te stimarrà Mariannina toja. (entra)
Pul. Lo finale?
Mau. (passeggiando parla fuori di sè per la gioia) Oh che ppiacere! io poteva mai credere che….
Pul. Lo finale?
Mau. Che essa… io… e ppure figliemo… ah! ca non ce capo dinto a li panne pe la contentezza! (entra)
Pul. Lo fina… che brutto finale! Aggio spiso 15 rana pe lo viglietto e non aggio potuto vedè manco lo finale.
SCENA VII.
Nicolino e detti
Nic. (entra con aria sostenuta, com’è uso della plebaglia) Chesta è la casa de Maurizio, e cca vene fratemo conseprino a ffa l’ammore co cchella smeuzella, pe cquanto mm’ha ditto ziemo. (guardando attorno)
Pul. (tra sè) (E sta lanterna de lo muolo che bò?)
Nic. So benuto co la menzione, moncevò lo fatto, de fa n’acciso e no mpiso, e sento già no fieto de mazzate!
Pul. (Guarda attuorno e addora! ha dda essere cane barbone!)
Nic. (fissandolo dice tra sè) (Chi è cchella marmotta?)
Pul. (intimorito) (Ah! ah! ncuollo a mme sta piglianno la mmira!)