Mau. (A lo piezzo concertato.)
Pul. (Avvisame quanno arrive a lo finale.) c. s.
Mau. Mariana! spiegate, te nne prego.
Mar. E cche spiegà e spiegà; ca da lo momento che ssite venuto dinto a sta casa, mm’avite fatta perdere la pace…
Mau. Gioja mia! comme…
Pul. (c. s.) (Mauri, è benuto lo finale?)
Mau. (Mo, mo!) (Pulcinella si ritira c. s.)
Mau. Ma io so vvidovo, tenco no piccerillo…
Mar. E cchillo piccerillo è stimato da me quanto a lo padre sujo.
Mau. Oh che, cconsolazione!
Pul. (c. s.) (È benuto lo finale?)
Mau. (S’aspetta accora.) (Pul. c. s.)
Mar. Io ve volarraggio bene cchiù dell’uocchie mieje…
Mau. Ma so no povero disperato…
Mar. Tenite però la ntenzione de faticà, e mm’abbasta; site no buono gioveno, sincero, e cchesto è cchello che mme preme.
Pul. (Mauri, è benuto lo finale?)
Mau. (a Pul) Mo. (esprime i suoi sentimenti sotto voce a Mariannina in modo che Pulcinella, rimasto a lui vicino, non possa sentire il seguente dialogo)
Mau. Gioja mia! bella, aggraziata de sto core! E ttu tenive sta ntenzione pe mme? tu! chesta è na consolazione…
Pul. (Maurì, lo finale?) (Mau. infervorato non bada più a risponderlo)
Mar. La cchiù consolazione è la mia si aggio l’ammore vuosto…
Mau. Sì, sine, co ttutto lo core.
Pul. (Lo finale è benuto?)
Mar. Addio, bello de Mariannina.
