Mau. Avrisseve piacere de mmaritarve?
Mar. (abbassando gli occhi) Vi mo, che addimmanne so ccheste?
Mau. Dicite la verità.
Mar. Ma lo partito…
Mau. Ricco non è, ma è no buono giovane.
Mar. (tra sè) (Ricco non è!… e cchisto è isso bello e buono! (giubilando) Ah! che lo core mme zompa, dinto a lo pietto!)
Pul. (presentandosi a Maurizio come prima) (A che stammo ne?)
Mau. (A la ntroduzione.)
Pul. (Falla chiassosa.) (ritirandosi)
Mau. (a Mariannina) Risponnìteme…
Mar. Io avria tutto lo piacere; maggiormente perchè lo giovane mm’è ssimpatico assaje.
Mau. No cchiù! e non parlaveve?…
Mar. Ve pare? attoccava a isso a ddirmelo.
Mau. Già, comme a ommo, avite ragione.
Pul. (come sopra) (A che stammo ne?)
Mau. (A lo primmo piezzo.)
Pul. (Fallo cauzante.) (c. s.)
Mar. Ma diciteme co la vocca vosta; chi sarria sto giovene?
Mau. (sottovoce in modo da non far sentire a Pulc.) Non ve dispiace: è uno co la faccia meza janca e mmeza nera, va vestuto janco… co na coppola ncapo…
Mar. (con eccessiva sorpresa) Chillo! e non… uh! bene mio! (con significato) E ccomme! vuje, vuje, mme venite a pproporre sto partito... justo vuje!
Mau. (tra sè) (« Vuje! vuje! » ditto co cchella forza… chesto che bbene a ddì?) Ne sì Mariannì?… spiegateve…
Pul. (c.s.) (A cche stammo?)