P. PAOL. Addavero?
BON. Fu giusto ieri… quanno le jette a fa visita, posaje seconno lo solito lo cappiello e lo bastone mio fora a la sala; quanno me ne jette, invece de trovà lo bastone mio, trovaie chisto.
P. PAOL. Oh bonora! e non poteva essere de quacch’auto passarotto?
BON. A chillo momento pure io penzai accossì… credevo… ma no, Caterina mi spiegò tutto. A essa le dispiaceva de vederme sempe co chillo bastone mio gruosso, saje chillo co lo pomo d’acciajo…
P. PAOL. Le dispiaceva, pe paura d’essere sciaccata in qualche circostanza.
BON. No, diceva che co lo figurino mio elegante, chillo era no bastone de n’omme de 5O anne,
P. PAOL. Giusto, e siccome tu ne tiene 49 e miezo…
BON. Non pazzià. Accossì m’ha regalato chisto. Ma si te dico ch’è na donnina adorabile… perciò non t’annasconno che me dispiace de spezzarla co essa.
P. PAOL. Bravo… sì risoluto addonca?..
Bon. Risolutissimo. Ma lo mbruoglio non sta ccà. Io ajere le scrivette na lettera de licenziata, e credevo che tutto fosse fernuto, né, quanno me retiro a la casa trovo no biglietto suio addo me diceva, che se io stammatina secondo il solito non vaco a casa sua, essa faceva sapé ogni cosa a mia moglie.
P. PAOL. Oh! che sarria bella!
BON. No sarria brutto. Io la conosco chella sarria capace de farlo. Figurate che scena, che scandalo in famiglia!
P. PAOL. Embé, ma comme vaò fà?
BON. Ecco perché so venuto a pregà a te. Tu avarrisse da jre da Caterina, e nu poco col buono e no poco con minaccie, persuaderla e lasciarmi in pace. Ricuseresti?
P. PAOL. No… anze io dinto a sti cose me ’nce spasso. Solamente che l’aggio da dicere?
BON. Tutto chello che vuò tu, abbasta che truove na scusa pe giustificà questo abbandono all’improvviso.
P. PAOL. Aspetta, le volimmo dicere che sì muorto?
BON. No, no, lo tengo pe male augurio. Dille che so partuto da Napoli, che so ghiuto a Milano, a Torino…
