Carm. — E va buono... nun piccïà... (esce).
Raf. — Comme te sta bella sta veste!... T’ ’a vuò levà?
Giul. — A n’atu ppoco... Dint’ ’o cumò nce sta pure a nocca celeste p’ ’e capille... (fruga nel tiretto, prende un velo bianco e lo mostra al padre) Papà, guarda: te ricuorde? M’ ’o purtaste quanno me facette ’a primma cummenione... (Il padre guarda con dolore la figlia) Mo ’o metto cca, ’int’ ’a sta scatola, accussì nun se sciupa... (seguita a cercare) Ah! ’A vi’ cca! (mostra il nastro cilestrino e lo lega tra i capelli) Me sta buono?
Raf. — Giuliè... iammo... cuccàmmece...
Giul. — (ha un forte colpo di tosse)- N’atu ppoco...
Raf. — He visto?
Giul. — Io me sento meglio! (ha come un capogiro).
Raf. — (sostenendola) He visto? Tu nun te mantiene all’erta... Iammo, famme cuntento...
Giul. — Sì... papà..., è overo... m’avota ’a capa...
Raf. — Cùcchete (sostenendola, la porta vicino al letto).
Giul. — Ma ’a veste nun m’ ’a levo...
Raf. — Comme vuò tu. (La fa sedere sul letto, accomodandole i cuscini alle spalle). Staie bona accussì?
Giul. — Papà, me vuò fa’ nu piacere?
Raf. — Di’... che vuò?
Giul. — Ma tu me dice ca si?
Raf. — Eh sì... te dico ca sì...
Giul. — Me vuò fa’ sentere l’opera d ’o diavolo cu Pulicenella?
Raf. — Giuliè, che vaie penzanno!...
Giul. — (con voce di pianto) Sì, papà... me l’haie prummiso...
Raf. — Giuliè, nun me fido... Tu saie c’ aggio faticato tutt’ ’a iurnata...
Giul. — Chi sa’ si ’a pozzo sèntere... n’ ata vota...
Raf. — Te si’ dispiaciuta? (Giulietta non risponde) Che mme puorte ’o musso? E te voglio fa’ cuntenta! Ma sulo l’opera d’ ’o diavolo cu Pulicenelia?
Giul. — Si... si... bravo papà!...
