Paggena:'E guarattelle.djvu/29

'A Wikisource.
Chesta paggena è stata leggiuta.
— 29 —


Raf. — Tu nun te movere ‘a lloco... Miettete ’a cuperta ncopp’ ’e ggamme... (le mette la coperta sulle gambe, poi va a sciogliere il sacco dei fantocci, si mette il grembiule a sacco, che li contiene; e, prendendo nella mano destra Pulcinella e nella sinistra Colombina, si prepara alla recita).

Giul. — Papà, nun abbrevià... Fammella senti tutta quanta...

Raf. — E va buono! (entra nel teatrino e con voce nasale, chioccia, comincia la farsa «Pulcinella e il diavolo»).


LA RAPPRESENTAZIONE

SCENA 1.ª

Pulcinella e Colombina.


Pulc. — (picchia alla porta di Colombina e la chiama) Culumbì!... Culumbí!... Culumbí!... (picchia di nuovo) Neh’ tu nce siente?

Colomb. — (s’affaccia al balcone) Si’ tu, Pulecenè?

Pulc. — Scinne: nun ’o vvide ca sta chiuvenno?

Colomb. — Zitto, ca nce sta ’o patrone!

Pulc. — E scinne zitto zitto...

Colomb. — Mo scengo... (scende e fa segno a Pulcinella di avvicinarsi) Si’ sempe nu scemone!

Pulc. — (abbracciandola) Sciasciona mia, viene ’int’ ’e braccie meie!

Colomb. — Tu si’ tutto d’ ’o mio!

Pulc. -— Chello ch’ è tuo è mio e chello eh’ é mio è tutto d’ ’o mio!

Colomb. — Me vuò bene?

Pulc. — Io moro e spanteco pe tte... St’uocchie tuoie m’hanno apierto na furnace dint’ ’o core. Io nun dormo cchiù, ’a notte. Me sceto, e penzo a tte! Nun arreposo, nun trovo cchiù arricietto... Me sento ’e viscere arrevutà... ’O core fa tic-tac. Io so’ nu Vesuvio!.. (abbraccia Colombina e la bacia).