Paggena:'E guarattelle.djvu/27

'A Wikisource.
Chesta paggena è stata leggiuta.
— 27 —


Giul. — E papà?

Raf. — Papà nun te lassarà cchiù... Starrà sempe vicino a te... Si’ cuntenta?

Giul. — (batte le mani per la gioia): Ah! sì... sì!..

Carm. — È fatto!

Giul. — ’E scarpe?

Carm. — Pure ’e scarpe? Addò stanno?

Giul. — ’Int’ ’o cummò... (Rafele le prende e le dà a Carmela).

Carm. — Dimme na cosa, mo ca te si’ vestuta vulisse ascì?

Giul. — No... me l’aggio vuluto mettere... che ssaccio... (Rafele guarda donna Carmela col gesto disperato di chi sa che il destino non ha più rimedio).

Carm. — (sottovoce a Rafele): E che so’ sti lacreme?.. Curaggio!.. Nun ’a vedite comme sta allegra?

Raf. — Ogge sta peggio! Nun vedite c’ uocchie tene?

Carm. — ’E piccerelle so’ fatte accussì... Mo ’e vedite abbattute, malate... a n’atu poco zompano e rideno... (a Giulietta): E’ overo ca te siente meglio? (Giulietta con la testa afferma e si avvicina al padre) Avite visto? Me date ’o permesso, don Rafè? Vaco a priparà nu poco ’e cena a Vicienzo, e torno subbeto...

Raf. — Facite ’affare vuoste...

Carm. — ( fa per uscire, poi ritorna ) E vuie, ’on Rafè, avite mangiato? Nu muorzo ’e cchiù, nu muorzo ’e meno, pe nuie fa ’o stesso... senza cerimmonie...

Raf. — Ve ringrazio...

Carm. — Ma che so’ sti ringraziamente?

Raf. — No, grazie... veramente... m’ aggio suppuntato ’o stommaco...

Carm. — Allora cchiù a tarde, quanno vene Vicienzo, trasite nu mumento addu nuie... v’aspettammo...

Raf. — Si... cchiù tarde... grazie!

Giul. — (con gioia): I’ pure...

Raf. — Tu mo t’he ’a cuccà...

Giul. — Voglio veni pur io...