La Batracommiomachia
LA
BATRACOMMIOMACHIA
ALIASSE
LA GUERRA NTRA LE RRANONCHIE,
E LI SURECE χ. τ. λ.
TRADOTTA
DA FRANCISCO MAZZARELLA
FARAO.
LA BATRACOMMIOMACHIA
ALIASSE
La Guerra ntra le Rranonchie,
e li Surece χ.τ.λ.
⁂
M
O che la sbornia de cantà mme vene,
A buie mme voto, nove guaglioncelle,
Sore de Febbo, azzò dinto a ste bene
Lo sango mme scarfate; e nfi a li stelle
Lo canto mio se senta; da Elecona
Venite. . ah ! zitto zì , ca a mmanca trona.
Signo de buon agureio. Uh che prejezza,
Si de mano mme resce sto designo;
Che de Troja l’agrisso ? na capezza !
No serra serra cchiù de Marte digno
Mo sentarrite. Ghuè l’aorecchie tese,
Storeia chesta non è de no tornese.
Sto figlio, che mo asciuto da sta mente
’N sino mme stace, e cchisto scartafaccio
M’enchie, chisto farrà, saccia la ggente,
Che sfonnereio se fece, e che scafaccio
No juorno, e comme po resta jenne ammisso,
Da po che lo scommosse Marte stisso.
Pocca ngarzapellute, e fforejuse
’N cuollo de le Rranonchie poverelle
Li Surece no juorno a mamano schiuse
Facettero no rumpe-sarcenelle,
Ppe ffa la scigna a chille, ch’a zzeffummo
Giove mannà tentaieno, e all’avotro munno.
E lo trascurzo, e chello ch’io aggio ntise
Da cierte viecchie nuostre, accommenciaje
Pe no sorece franco d’esse acciso,
Che le ggranfe no juorno scapolaje
De na gatta, e ch’a no pantano jette
Ppe bevere, e lo musso nce mettette.
Addò mentre lo scuro s’addecreja
De chell’acqua accossì rrosecarella,
Sguazzarejanno tatanara steja
Na Rranonchia a contarle le ssorzella:
Frostiè, po le dicette, chi si? e ddonne
Marfuso accossì assumme a ccheste sponne?
Dimme, previta toja, a chi sì ffiglio,
Ghuè! non dì la boscia, ca si te trovo
Fedele, e bero ammico, mme te piglio,
E a la casa te porto, addò comme uovo
T’enchiarraggio de bene; saie ca songo
Lo Rrè de le Rranonchie, e ccà despongo?
Mme chiamino Abbottaguoffole, e da me
So ttutte lo Rranonchie commannate,
St’ische, st’erve, ste rripe, e quanto nc’è
Ppe sti vuttare, e st’acque mpantanate,
A lo commanno mio de notte, e ghiuorno
Io tengo, e bì so mo non n’aggio attuorno.
Zanguso de lo Po ncoppa le rripe
Co Acquarolella soia nquaraquacchiaje,
E da lo ncippo lloro, vì che stipe!
N’uovo caduto llà, io nne sguigliaje.
Tu mo dì, cammarata, pocc’a chello
Che bego, tu mporzì si guappo, e bello.’
Tu spamfeio de grannezza puorte ’n facce
Scritto, e lo signo, e ca da Rrè si nnato,
Tu porzine a la cera, e a li mostacce
Mustre, che ssinghe a guerrejà portato,
Via su, spapura, frate, e ddince priesto
De la streppegna toia tutto lo riesto.
Arrobbamollechelle ’n posatura
Se mette a la smargiassa mbrodejata,
Se scotola li baffe, e po spapura
’N tuono de sorfautte: Cammarata,
Pecché ’n cuorpo te sguiglia sto golio
De sapè da ddò vengo, e chi songo io?
E l’uommene, e li Deje, e nfi a l’aocielle
’N areia addemmanna, e spia’n tutte li pizze,
Ca tutte sanno Arrobbamollechelle,
Figlio a lo guappo Rrè Rosecapizze,
Smargiasso, arcevalente, e speretuso,
Che sa ffare, e ttrasí ’nn ogne ppertuso.
Gnamatre mia, e chi non sa, ca è
Leccamacene? E be la sanno tutte,
Figlia de chillo granne, e fforte Rre
Ppe nnomme ditto Rosecapresutte:
Dinto a no nasconniglio mme nghiermaro,
E llà nnasciette, e già non aggio paro.
Llà po, miette ppe tte, quanta carizze
Ch’avette peccerillo, e quanta squase,
Mamma da ccà projevamme le zzizze.
Tata da llà mme deva tanta’ vase:
Chiù ggranne mmabbottaie de cose duce,
De sciosciole, de passe, e ffico, e nnuce.
Ma dimme; ’n capo mo corame te vene
D’ammico mme te fa, si ppe nnatura
lo ’n niente t’assomeglio? tocca a ttene
Sommozzare, e campà ’nn acqua, e berdura;
Quann’io, che buò natà! ma stò ’n coccagna
Sgranando tutto nzò che ll’ommo magna.
Li tarallucce ’n tonne canestelle
Stipate trovà saccio, e le mpepate
Pizze chiene, presutte, e ffecatielle
Dinto a le rrizze janche arravogliate,
Joncate, e caso frisco tanno fatto
Dà latte saporito io mporzì ggratto.
E ddì ca no nè sbommo pizzeduce,
Che nfi a li Deje fanno cannagola;
Tutto ’n soma arramocchio, o è scuro, o luce,
E lo ppuò addemmannà, ca famma vola,
Nzo che li cuoche sanno apparecchiare
’N pegnate, o ’n cazzarole ppe’ sgranare.
Maie de guerra scanzaie tristo fracasso,
Ma anze lesto nfra primme commattiente
’N zuffa mmescato, maie no retopasso
Ppe paura facette; o mancamiente
Sempe l’ommo ppe mme fu no chiattillo
O avoto, o vascio, o chiatto, seccolillo.
Lo cchiù bello è bedè ncoppa lo lietto
Quanno chiano chianillo iamme ne saglio,
E zzitto, e mmutto mentr’isso è a rrecietto,
Che ghiusto tanno vale no fragaglio,
Le roseco le pponta de le ddeta,
Le ccarcagna, e isso ronfa, e non se sceta.
Doie cose non perrò schitto a sto munno
Mme fanno addegrenì lo spiretillo;
Lo sproviere, e la gatta, ch’è zzeffunno,
Ppe: ttierzo llo ttrirì de lo mastrillo:
Chisto co nganno mme fa cannagola,
Traso, sbalestra, e bonanotte a Ccola.
Ma nfra dell’avotro pò chella chiappina
De gatta ppe le pposte a becenzone.
Mme fa correre, e ’n fruscio, l’assassina.
Pocca è ffurba, nè nc’è remessejone,
Ca ddò mme mpizzo, stritto lo pertuso
Po esse, e ffitto, ca llà essa m’ha schiuso.
Non pe chesto de caole, e rrafanielle
M’abbotto, e dde cocozze; vierze, o acce,
Nè ghiete vìerde, carde, e mmercolelle,
Che buie ammagliate dinto de ss’acquacce.
Volea cchiù ddì, ma ’n sentì tanta cose,
Sbruffanno Abbottaguoffole respose:
Cammarata mio bello, troppo faje
De spanfeio ppe sso tuio raro ngorfire;
Avimmo nuie mporzì, potta de craje !
E ’nn acqua, e ’n terra cose da stordire.
Anfibeie le Rranonchie ha ffatte Giove,
Mperzò ’n terra, e ssott’acqua tu nce truove.
Si no mme cride, e mmeglio assecurare
Te vuò de nzocchè ddico co lo fatto,
No nce vò tanto, ’n casa mia portare
Mo te pozzo volanno nnitto nfatto:
Accravaccate a mme, tienette forte,
E statte alliegro, già simmo a le ccorte.
Le ggroppe ntra sto mentre le votaje,
Ed isso ’n duie zompille grellejanno,
Teretuffete ’n cuollo le saotaje,
Co le ggranfe a lo cuollo s’afferranno:
Sfizeio l’ammico ’n primmo lanzo trova
’N zuoccolo jenno ppe la strata nova.
Da ccà ncoppa a le rripe smiccia, e sciala
Verdejare la nepeta scioruta
Da llà la canna, che ss’aiza, e ccala
Squatra, e le pare già ca lo saluta;
Ma nninche autro non vede ch’acqua rossa,
L’accommencia a ghielà lo sango, e ll’ossa.
Tanno era lo bedè li chiante ammare,
Li pentemiente nnutele, e ssospire,
Lo ghiastemmà faceva, e lo sciccare:
Li pile da la capo, e lo sbenire;
A lo ventre li piede astregne forte,
Ca co ll’uocchie se vede già la morte.
No tippe tappe ’n pieno fitto fitto
Le sta lo core a ffa co mmuodo strano,
Li piede posà ’n terra vorria schitto,
Ma sto golio a lo scurisso è bano;
Pocca lo tremmoliccio già l’afferra
E ll’uocchie ppe paura e rrape, e nserra.
La coda tanno ’n primmo ncoppa ll’acque
Abbannonanno stese, e comm’a rrimmo
Strascina, e li peduozzole già stracque
E addebbolute s’enchieno de limmo:
Li Deie scongiura, ’n terra a ssarvamiento
Lo facciano arrevà; ma tutto è a biento.
Aodenzeia non ce stà, non c’è ppietate,
Ca llà le tocca a ffa lo papariello,
E mmentre ntra chelle acque ntrovolate
Lo ziffe zuffe fa lo poveriello,
Strilla, e chiamma ziozio a boce stesa,
Ma chella voce soia da nullo è ntesa.
Giove, dicea, accossì ncoppa a le schene
’N jenco sformato non se carrejaje
Chella sarma d’ammore, da l’arene
Quanno de Tiro se zeppoleiaje
Aoropa bella soia, e ppe lo mare
’N Creta portaiese, ppe se ngaodejare.
Comme sta guitta de Ranonchia ’n casa
Dicenno, ca portare mme voleva,
’Ncuollo chiavatamme, isce la marvasa,
Da sto Munno natanno mo mme leva:
’N chesto no serpe d’acqua assoma; e rresta
Na facce a ttutte e dduie d’aglie, e d’agresta.
Lo cuollo comme a ffuso ritto, e triseco
Chillo schiavizzo, e n’uocchio strevellato
Portava ppe chelle acque; ma lo riseco
’N che siniccia Abbottaguoffole scasato,
Agghiaja, e ssenza chiù pensare a avolo,
Zuffete abbascio, e ssarvo è cco no savoto.
Co no semmuzzo addonca sparafonna
A capetrummolo lesto, e quà compagno
Non pensala mo assommale mmo zeffonna,
E che ghiettato ncoppa a chillo stagno,
A fforza sarria muorto, ma aie meschino!
’N chesto lassato llà cade sopino.
Stregne le ggranfe, e co no ziozio
Peccejanno, morenno se l’allippa
A ffunno mo lo vide, uh bene mio!
Mo a ssummo tutto nfuso co la trippa;
Sbracceia, cauceia ppe se sarvà la panza,
Ma la morte mperrò isso no scanza.
Li pile zuppe d’acqua granne aiuto,
Ppe a ffunno lo menà, pure le danno;
E mmentre llà la strata de ì a Ppruto
Trova l’affritto, accossì gualejanno
Dice mentre s’affoca despettuso
A cchillo Abbottaguoffole vavuso:
All’uocchie de li Deie, brutto marmotta
Nnascuso no starraie ppe chiste fatte:
Comme accossì ccà ’n miezo a ffa na botta
Mme lasse a ttrademiento, e ghiette, e sbattr
Da cuollo a tte, birbante, da le rrupe
Comme no mpiso jettase a li lupe?
’N terra ppè cierto, nfammo, maie appassato
A ppuneia, a llotta, o a na carrera liento
No mm’avarrisse no tu maie trovato;
Mo co lo nganno de no compremiento
Dinto a st’acque triffuoche traditore?
La prodezza co mmicò, e lo valore?
Sacce mperrò, ca nc’è no Ddio, ch’è ghiusto,
Lo saoato non paga, e tutto squatra:
De m’affocà non c’aje avuto gusto?
La scontarraie mperrò cierto a la squatra
De li compagne mieje, e non sperare
La vennetta tu mo de nne scampare.
Nfi a ccà chiacchiarejanno se sfocaje
Arrobbamollechelle, lo scurisso,
Ntra se l’arraggia, quanno sparpetaje
Denno l’utemo assingo, e a lo prefisso
Punto arrevato, nteseca, e se stira
E ntra chelle acque sbraccejanno spira.
Leccapiatte, ch’areja a rresperare
Credo, ca ncoppa a cchelle rripe vierde
Steva, chesto ’n vedè, n’allucco a aozare
De core le venette; e fa se perde
No sorece valente isso appe a fforte,
De carrera avisaie mperzò sta morte.
Quale ’n ssentì lo sorecismo ntiero,
Pp’arraggia resoluto è stermenare
Lo Ranonchismo tutto nfi a no zero:
Mperrò da li vaglive fa ghiettare
No banno, ch’pgneuno all’arba chiara
De comparè a ppalazzo se prepara.
Nnanze a Rrosecapizze annegrecato,
Patre de chillo affritto muortacciso,
Che pe lo lago ancora jea menato
A la smerza llà ’n miezo, e ppiede stiso
De Stato lo consiglio se tenette,
Isso parlaje, e zitto ognautro stette.
Da che dell’arba a lo spontà comparze
Tutte subeto ccà site, cardasce,
Rosecapizze dice, e simbè sparze
Ppe ttufole, bauglie, e stipe, e ccascie,
Si mme vedite mo così ncreccato;
Adaso, ve sbroglio io mo sto ffelato.
E’ bero, ca a mme schitto sţi guajune
A ccofena la sciorta mme devaca,
Ma gliannola commone a buonnecchiune,
Addò remmedejà non pò trajaca,
Ppe ll'avotre sarrà puro no juorno,
Si mo non arreparammo a sto taluorno.
Vuie già sapite, quanto sbentorato
De figlieme so stato, lo ssapite:
Tre belle mascolune mm’ha scriato
La muscia, lo mastrillo, e i cosciabbite;
Zoè lo primmogeneto no gatto
Mme sbennegnaie lo mpiso nnitto nfatto.
De foracchio nne jeva lo masavoto,
Ma figliemo, che d’era nsemprecone,
Simbè s’annasconnette co no savoto,
Da dinto a no pertuso lo breccone
Fora te lo cacciaje, e ’n canna liesto
Lo scanna, e se lo sgrana priesto priesto.
De lo secunno l’ommo marranchino,
Che mmanco de pietà lo nomme sape,
Ahi scuro me! nne fece no bottino,
Scammazzannolo nziesto addò se rape
Chillo strommiento, che de ligno è ffatto,
Ditto mastrillo, e ppeo è d’ogne ggatto.
L’utemo schitto, che mm’era rommaso,
L’uocchio deritto mio, e de la mamma,
Da sto munno mo mo bello m’ha rraso
Abbottaguoffole guitto co na tramma
Degna d’isso, che ’n miezo a no pantano
Portannolo affocaie co mmuodo strano.
Ppe chesto, alò compagne, all’arme tutte,
Ca tiempo è dde vennetta, e cchisto cuorno
No è cosa da tenerce: a sti frabutte
Dammo ’n cuollo, e llevammonce da tuorno
Sto frusciamiento: alò priesto marmammo.
Tutte senza pietà taccariammo.
Ste quatto parolelle accossì acconce
Facettero, che tutte comm’a llampo
Corzero a armarse, e simbè cierte scuonce
Stevano, Marte attizza a ccalà ’n campo,
Ll’arma de posta, e già ch’a isso mporta
De la guerra, non fa chiù ggatta morta.
Li cosciale le nzaja ’n primma a ffarse
D’ungole vierde a na starza de fave,
Che la notte passata a rrosecarse.
Erano state li manzippe brave,
Che a le stanfolle beilo adaso adaso
Se cavoza, acconcia, e attacca ogne marvaso.
Giacche, e ccorazze se ntosciaieno puro
De cuoreje de gatte scortecate
Co ttutta polezìa simbè a lo scuro,
E de paglia mvottite, e strafasciate:
Ppe scuto de locerna no vellicolo
Nvracciattero a ffa sarvo lo ventricolo.
Cosaccolare cierto de metallo,
Nciegno da fa tremmare, e nvenzejone
De lo sio Marte, fuieno senza fallo
Chelle llanze mmardetre; e ncrosejone
Ppe sboreja se chiamano feruce
Ppe d’erme ’n capo coccole de nuce.
De sta manera armato lo nemmico
’N che se sapette ndubbetatamente
Da le Rranonchie afflitte, de lo ntrico
La caosa le resta solamente
A ssapè mo, pecchè tanto armamiento
Tanta fracasse, e mmo sto zucamiento?
Ppe appurà chesto ccà da lo pantano
Ogne Rranocchia nn’attemo ecco fora,
No luoco stabbelescese stremano
Ppe consiglio tenere a le pprimme ore,
De guerra ntenno io dicere, e ppensare
A sto guaione comme arreparare.
E mmentre affritta ognuna scellevrellase
A ffa castiellennareja, e ircocierve,
N’algozzino llà assomma, quale appellase
Trasempignato, ch’è tutt’ossa, e nnierve,
De Scavacaso guappo a ffare male
Be lleggitemo figlio, e nnatorale.
Lo scettro ’n mano ’n signo isso portava,
Quanno de guerra la nova terribele
Jette a pportare, e mmentre la ntemmava
Ccossì decette: alò, stremmineio orribele,
Ranonchie quaraquacchiare mmardette,
Tiempe è de fa de vuie, magnasaozette.
Lo Sorecismo tutto nfurejato,
E ammenacciuso mo ve ntimma guerra,
E ttanto tanto stà ndejavolato,
Che ppe ve stremmenare da sta terra,
Muodo no llassarrà; ddonca v’armate
A mmiccio, ed a ffocile, a spite, e a spate.
S’è già appurato lo gran trademiento
De lo sio Abbottaguoffole Rrè buosto,
Che co la scosa de no compremiento
'Arrobbamollechelle frate nuosto
Nce accise, e bà pe ll’acqua connolanno,
Vì lo vì, che ve venga arcemalanno.
Si addonca ntra de vuie mo quarche sguessa
Se trova, e sse presumma d’esse guappa.
’N capo mo scenga armata, e sia a la mpressa
Si mesorà se vò na bella cappa:
Chi ha stommaco se vede a st’accaseione,
Ma vuie se sa chi site, aneme bone.
Ccossì dditto scomparie: e sti trascurze
Sorecische ntrattanto into a l’aorecchie
De le Rranonchie, aiemè! che comm’a turze
Rommasero, ntemmate a le sserrecchie,
Ahù che brutto affetto lesto fecero,
Tutte stonaieno, e barbascia desfecero.
A Abbottaguoffole tanno ttaffe attuorno
Tutte cheste se fanno, e se lammentano
Dicenno: quanno fuie nè, quanno sso juorno?
Che ffu sto sorecideio, o se lo nventano?
’N sentirle Abbottaguoffole s’aozaje,
E sbruffanno elicette: atta de craje!
Cammaratune mieje, io maie ssa zoccóla
Vidde, o accedette (e nneia tanno de palla
Tutto lo mpiso) Jessa comm’a ccoccola
Natà volenno, e ghì ppe ll’acqua a ggalla,
Mentre se spassa a ffa la scigna a nnuje
S’affoca, e lo vidde io manco de vujè.
E mmò ss’arraiese guitte marranchine
Jettarme vonno ’n cuollo ssa colata
A mme cche sso nnozente: ahù destine!
Ma dammo mo addò tene, e a sta jornata
Consiglio che se tenga: alò pensammo
Comme ssa mala rrazza stremmenammo.
Io cierto comme ’n cuorpo mme la sente,
Ve la derraggio, e nno la sbagliarrite:
Jateve a armà belle polite; e attiento
Ognuna stia a ppresedejà sti lite,
Ste rrippe aote, e scoscesele sti derrupe,
Ste bavose scogliette, e ffuosse cupe.
E cchesto pecchè mnio? pecchè facennonce,
Chi sa, na rrozzejone a la ntrasatta,
Allocane li chiochiare credennonce.
Cara facimmo ognuno se l’accatta,
Ppe ll’arme e l’afferranno vrociolammo,
No stante ca so armate, da ddò stammo.
Ccossì sto lago tutto sarrà cchino
De surece affocate ’n quatto botte,
Che de nata ngnorante ppe destino
’Nne cacarranno affé le ppera cotte,
E nnuie ccà ppò de na vettoreia tale
Grellejanno farrimmo carnevale.
Ditto accossì: de botta tutte quante,
Corze l’ammico a armare, e dde marvune
’N primma da lo caruso nfi a le cchiante
De li piede nforratte li guagliune:
De iete vierde cierte pampanazze
A le scianchelle deze ppe ccorazze.
De cavole pigliaieno frunne, e ffoglie,
E scute nne facettero azzelliente:
Ppe llanza, che no accide a chi non coglie
(’N sanetate sia ditto a chi nce sente)
No jungo ’n fede mia infingo, e appontuto
Ogne scianchella mbraccia co lo scuto.
E ’n capo ppe celate, e mmorrejune
De maruzzelle coccole sottile
Gomme che se chiantaieno, li squatrune
Nne nattemo stregnetterose ’n file
Ntuorno de lo pantano, ma a l’aoture,
Ca abbascio no le parze stà secure.
E llà mo lo bedè era no ncanto
Tanta scianchelle se provà a là scherma
Cochelle llanze smorrejanno, e ntanto
Chi saoda smargiasseia, chi mai stà ferma;
E si lo vero dicese: Gradasso
Ognuno già pareva a lo fracasso;
Giove chesto ’n vedè, ncoppa a lo Cielo
Stellengeramato a no consiglio chiamma
Tutte li Deje, e ( ah ’n dirlo mo jelo )
Loro mosta le squatre, e la gran tramma
De la guerra mmenente, e li sordate
A mmegliara, e ttorzute, e spotestate.
Co no resiilo nzuccarato, e ddoce
Cossì ’n primma spapora: vi ch’arraggi!
Vi quanta fureia all’uocchle le straloce
A st’aserzeto guitto, che malannaggia.
E bì che llanze longhe ànno a le mmano!
Potta de nnico! alò, stammo lontano.
De li Ciantaore justo mo mme pare,
O de i Giagante (vuie mo già ssapite)
L’aserzeto ch’ammarcia ppe assaotare….
Ma chi de vuie sarrà mo ’n chesta lite,
Segnure deje, e ntanto dubbeia mpresa
De le Rranonchie, e Ssurece ’n defesa?
A Ppalleta se vota ’n chesto mente
E ddicele: tu figlia benedetta,
’N defesa corrarraie mo certamente
De li Surece, a tte si chesto aspetta:
Chiste a l’addore de l’arruste sacre
Lo tempeio tuio scorrenno, maie so mmacre.
Ma quanno appe scomputo lo sio Giove
Sta chiacchiarella soja aggrazejata,
Palleta nzorfatella a cchesce nnove
Responnette accossì: Papà, sbagliata
Cierto l’avite: s’io vedesse acciso
Lo Sorecismo tutto, uh uh che rriso!
Le pparte maie de chessa rrazza perra
Sartaggio ppe peglià, ca chisse danne
Mme n’hanno fatte, e quanta, uh! che l’afferra,
Lo piello nnanze: chisse le giorlanne
Fuorze ca arroienate isse non m’hanno,
E le llocerne, e ll’uoglio, e ffatto danno?
Ma soprattutto mm’è pparuto a fforte
Chello, che mm’hanno fatto a spertosarme
Lo manto mio, che a le cchiù notte corte
Mporzì suonno arrobbanno, stie a ffillarme
De tramma e stamma sottelella, e ffina,
E ’n tessenno schiaraieme arba matina.
Otr’a chesto da pò lo cosetore
Fitto fitto mme zuca, e stà a sseccare,
Terze, e aosure aseggenno, e mo a lo core
Saccio io che tengo: e ba no tte ngrifare!
Mprestata mm’aggio cierta nforra, e chesta
Aggio a ttornà, no ll’aggio, e ccà è l’agresta.
No ppe chesto, Papà, io pò votarme
Voglio, e sentì parlà de le Rranonchie:
Chesso mporzì lengute songo, e ffarme
No compremiento le brutte panocchie
Se degnattero quanno, e non ha mmuto,
Da na guerra tornaie sarva ppe buto.
De sse ccapo de viento, caposciacque
Co ttutto: ca io steva stracqua, e strutta
Una non se trovaje intro a chelle acque,
Ch’accrejanzata fosse, razza brutta!
De farese pepitola afferrare,
E ppe no creddo farme appapagnare.
Co no crocò, che non fenette maje
’N somma juorno arbejaie, e no dolore
De capo, ppe beglià, mme sciruppaie,
Mperrò, sie Deje mieie, lo bell’ommore
De fa lassammo, e d’ajutà ssi ruonte,
Ca a li rommure è buono aozà li puonte.
Quarcuno llà de vuje avè potria
No niespolo stratiempo annodecuso
Da quarche ffrezza appontutella, ’n via
Se già ssongo le squatre, e balloruso
Si quarcuno de vuie se ntrammettesse
Non perzò cessarriano le cconesse.
Addonca da ccà ncoppa stà a bedere
St’arravuoglio addov’ha da ì a pparare.
Ca d’avotra banna non sarrà gaudere:
E accossì dditto, a chesta tutte pare
Li Deie d’asseconnà stemmaieno buono,
E ’n tierzo luoco aonite eccole ’n trono.
’N chesto duie spogliampise de Vaglive
De la battaglia lo nsegnale portano:
Li tavane mporzì flagellavive
Co ttromme stremenate, e ccomm’a ttortano
Ntorcegliate l’orribele fracasso
De guerra strommettaieno, e lo sconquasso.
E lo sio Giove saturnisco puro,
Che da coppa lo Cielo stea a bedere,
Buhuh, spara no truono, che ssecuro
Nsegnale è de battaglia, e de le ffere
Chianchime, e già pe ll’aria schioppa, e ntróa
E le mmano a menà chellete sprona.
E lo primmo a provà botta de lanza
Gralleccante se fu lo poverello,
Che stnafarato ’n miezzo de la panza
Spertosà se sentìe lo fecatiello
Da Graallucante, e d’esser se mettuto
A pprimma fila, se trovate pentito.
Pecchè a lo cuorpo spotestato, e strano
De facce ’n terra le toccale de ire
Tutto chino de sango ’n chillo chiano
De polve la pelucca s’appe a nchire:
E appriesso a’ chisto da Trasempertuso
Zatigarola provaie na botta all’uso.
Zoè na solennissema joncata
’N miezo a lo pietto le sonaie de sciorte,
Che cadenno, chell’arma nfurejata
Da lo cuorpo d’ascì le parze a fforte,
E mmentre se l’allippa, e chi sa ddove,
Nasafasa l’acciaffa, e non se move.
Jettazzaro, e mo chesto è cchiù che bero,
A Trasempegnato spacca po lo core
Co na lanzata, e cchisto è lo corriero
De guerra a le Rranonchie ntemmatore:
E Sgranapane ’n panza a Strellazzaro
Na botta consegnàie senza reparo.
Ppe la quale l’affritto musso’n terra
Ttuffate abbascio, e da lo cuorpo sciovota
L’anema, che maie cchiù sapè de guerra
Dice ca vò, ppe ll’areia se ll’ha covota:
Sguazzampantano Rre ’n chesto che bede
Strellazzaro perì,, oh senza fede!
Strilla, e na vreccia comme de molino,
Canzo non danno, ’n mìezo a la nocella
Nsiesto le sona, e ba ca non fuie ’n chino,
A Trasempertuso che no niro mbrella
De neglia tanno orribele de morte
All’uocchie se trovaie de n’avotra sciorte.
E Grallecante simbè smafarato,
Co la lanza ch’aveva stralucente
Piglia nsiesto la mira, e ppe no lato
Sfecata Abbottaguoffole: e ntramente
Strommacavole chesto smiccia, azzuffa,
Ma ’n foire mperrò no ascìe de zuffa;
Pecchè simbè ca la gran guittaria
De foì ppe paura isso facette,
E ’n chesto vrociolanno ppe la via
A li sprofunne de lo lago cadette,
De fare lo nfernuso non cessaje,
Pentutose anze arreto se tornaje.
Ma Gralleccante, che no steva llà
A ffa lo sasco, o nespole a mmonnare;
Già ch’a mmorì, dicette, io aggio a ccà,
A tte puro nne voglio arrecettare,
E beccote na botta dalle, e acciso,
Che chiù non pepeteia, e llà chillo è stiso.
E comme si scannato llà no voje,
Lo lago se facette russo russo,
E ’n chesto Gralleccante comm’aroje
Stese li piede, e già astregnìe lo musso
Rente de lo pantano ’n chillo fango
Ntra sivo, porcarie, stentine, e ssango.
Da coppa de na ripa Lagarulo
Scavacaso a Ccaronte nn’abbiaje:
E Nepetaro ’n che se vedìe sulo
’N faccia a Scavapresutto, se sporcaje
Le brache ppe paura, e ’n miezo all’onna
Zompa, jetta lo scuto, e sparafonna.
Sguazzannacqua: a lo Rre Magnapresutto
No compriemiento fa de na vrecciata
’N miezo a lo fronte, e line lo fruscia ’n tutto
Da sto munno, nè chiù nce vò stoppata,
Ca ppe lo naso sango, e cellevrella
L’ascenno, se sporcale llà le mmascella.
Leccapiatto ’n cuollo co na lanza
De lo gran Jacinzango lesto corre,
Lo nfila co na botta justo ’n panza,
E nne lo coglie, nè cchi lo soccorre
’N chille guajune lo scurisso trova.
Ma na negliola futa all’uvocchie prova.
Magnapuorro, che lo sio Sciaoraddore
No llontano l’allumina, ppe no pede
L’afferra, e co no cuorpo de valore
Lo strascina, sommozza, e pò lo vede
Dinto ll’acqua affocà, ca co na mano
Ppè lo cuollo l’acciaffa llà lo cano.
Ora vistese mo tanta compagne
Ferute, e accise Arrobbamolechelle,
Se mperra, e mmaloreja, e sse le fragne
’N pietto lo core centra a le scianchelle:
E a bennecarse ’n primmo a Zangarulo
La panza sfrecagliaie, nè ffuie lo sulo.
Chisto ’n primola perrò le sconocchiaje
Nnanze a li piede, ca le fuie spaccato
Lo fecato ppe mmiezo, e appalorciaje
Lo spireto a lo nfierno: e lo sciaorato
Scarpisalota ’n che bede sto fatto
Llà ccorre a ffa lo potta co sbaratto.
E de zango na vranca a chillo ’n faccia
Sto temmerareio schiaffa, e tte lo nchiacca,
Che quase lo cecaie: ma co le braccia
Nervorute, e bedè, comme te sciacca
Chisto mo a chillo, che già sfrantommata.
L’anca destra be ll’ha co na vrecciata.
Ca l’ammico chisciato de sto smacco
No piesco, stermenato che llà ’n terra
Fuorze steva ppe ttermete „ ppe Bacco,
Dice, e a Scarpisalota ndrizza, e afferra
Tunno de palla ’n fronte a no denucchio:
Potta de nnico! e spezza qua fenucchio!
Ora chisto mo ccà coll’anca rotta
Stiso ’n terra nfangato, ed a la smerza
Lassammo stà, ca già de contrabbotta
Quacquaracquà, mo vene, e comme a cerza
Forte, simbè sudato, a bennecare
L’ammico, che llà bede, sparpelare.
Corre mperzò, e ppò torna a chillo ’n cuollo,
E ’n miezo de la trippa le consegna
Chiù botte spotestate, e già nnammuollo
L’accedetario jungo isso se ngegna.
Tutto dinto la panza de ficcarle.
E le bentramme tutte llà scacciarle.
Strudegrano, che mmò ncoppa a le sponne
Chillo accossì acconciato ppe le ffeste
Vede, la mappa rodese, e ss’asconne
Zompanno intro a no fuosso, chelle nfeste:
Granfe de morte ppe scanzà, e sse mena?
Zuoppo comm era, e sdellommato ’n schena.
Rosecapizze a lo sio Abbottaguoffole:
Na botta consegnaie ’n ponta a no pede:
Lo spasemo l’afferra, e li pantuoffole
Llà ’n miezo a chi le bbò scappanno cede,
Ca co no savoto dinto a pantano
La pella de sarvà pensaie; ma nvano.
Pocca no ttanto ca Rosecapizze
Addonaiese ca ancora friccecava
Chillo, che spedorzato: avea, le stizze
Mo lo tornano ’n capo, e co na crava
Votase arreto, le dà ’n cuollo, e accide
Lo nemmico, lo squatra, e se nne ride.
E mmentre miezo muorto puro smiccia
Chillo, che ppoco fa passaie borrasche,
Porrajuolo a acconcià va la pelliccia
Correnno ntra le primme file guasche,
Tira, sarvo lo scuto, ca mpezzata
La ponta, llà rrestaie de chella spata.
Ntra surece no cierto nsuperabele
A llanza corta commattente nc’era,
Che no Marte pareva, tanto era abele
A lo mmenà le mmano ’n chella schera;
De Trammappane valoruso figlio
Uneco a mmette aserzete a scompiglio.
Arrobbasfuoglio chisto se chiammava
No giovaniello isso era, e nnervoruto,
Che li compagne sulo isso scacava
Quanno schitto faceva no stronnuto;
Ma otra de quanto mo da nuie s’è ditto,
Capetaneio mporzì era lo guitto.
Ora da ll’avotre chisto se scompagna
Ca fummosiello isso era de natura,
Ncoppa ll’avoto se fa de na montagna;
Zoè de chillo lago ncoppa a n’aotura,
E chino d’isso mo, de: stremmenare
Le Rranonchie ncommencia a mmenacciare.
E ppe: cierto’ ca fatto l’avarria,
Ca stommaco nn’aveva, e le vastava,
Se ’n chillo stante affè no lo sentia
Chillo, ch’uommene; e Ddeie tanno ncrejava,
Che mmoppese a ppietà, chillo vedenno
Accideio de Ranonchie, e strazeio orrenna.
E scotolanno chella gran capocchia
Lo sio Tronante de Saturno figlio
Potta de nnico! dice, troppo cocchia
La roina vedo io ’n chisto scompiglio
De le Rranonchie a ttutta la jenimma;
Ma reparo a sto guajo ah diase ’n primma.
Ppe Pararacco io ccà stongo vedenno
Cose da fa strasecolare affatto.
Vedite chillo llà? chillo tremmenno
Arrobbasfuoglio, che non temme Gatto;
Lo caruso ammaccà già è rresoluto
’N chillo pantano a tutte lo cornuto.
Ma priesto alò, che non se perda tiempo,
Mo Palleta che baga, guerrantrovola
Co Marte a lo nfrenà, ma che ssia attiempo
Si no coll’uoglio fritta è già sta provola:
Terribele, è lo vero, isso è, e ttregliuto,
Ma a cchisse a ccarfettarlo costa muto?
De tatanà scomputo, ch’appe Giove,
Marte lesto accossì le responnette,
De figliata, e dde me tutte le pprove
Nvano sarranno, e chi se nce vò mette?
Ca ppe scauzà da chisse lo stremminejo,
Na cufece no ba sto patrocinejo.
Ma si addavero darle qua seccurzo
Arresoluto site, tutte nzemmora
Llà nce nne jammo, e ttutte co no turzo
’N mano te li spaccammo, o senza remmora
Ssi gran furmene tuoie sconquassamunne
Scotola, alò, e accossì li sparafunne.
Io saccio le pprodizze stremmenate
De ss’arme lloco smafaragiagante,
Saccio mporzì de li Titane armate
Lo maciello terribele, no stante
Ca soprattutte gruosse, e ffuorte, e mmute
Erano, e a lo ppenzà stuorte, e ssapute.
E comme chillo Angelado mmarditto
( Schitto ’n vederlo te facea sorrejere )
Nfra ll’avotre birbante foie cchiù ffritto,
Ca attaccato abbiaste addò chiù rejere
Mongebello non potelo chiù ’n cuollo,
E ppuro llà le tocca a stà nnammuollo.
Ccà Mane ammafaraje, e tanno tanno
Giove arrossato na sajetta ardente
Vecco te lama, e già corre ntronanno
Brhuhuù lo Cielo, che pparìe cadente;
Ma sta sajetta, che scassinnno abbia
Vola, sisca, e sfracassa, arrasso sia!
Tutto lo Munno se credìe perduto,
Ca ’n tunno straballaie, maciullo truono
Schitto ppe ddare a le scianchelle ajuto,
Li surece a spantà co tristo suono,
Giove abbiaje sparanno, e se spantaro
E Ssurece, e Rranonchie tutte a pparo.
No ppe chesto mperrò lo temmerarejo
Aserzeto sorcigno la scompette,
Anze de chiù mannà chelle pe ll’arejo,
E dde mie fa mesesca non se stette,
Arresoluto stremmenà sta razza
Guerresca, mpertenente, e capopazza.
E se da cielo muoppeto a ppietare
Messè Giove a la fine non se fosse,
Addio Ranonchie ppe n’aternetate,
A rrevedernce ’n casa de Menosse.
Ma attiempo a chelle affritte rrazze aquareje
N’aserzeto abbiaie d’aoselejareje.
E già de botta ccà vecco arrevate
Sti sordatune ncuteneschenute;
E granfestuorte, e ttutte sdellommate,
Cammenante de scianco, panzanchiute,
Piedancenuse, e bucche fuorfeciante;
Cuoreje cocciute e dda dereto, e nnante.
De natura tottuosse, e cchiattenschena,
Spalleluciente, e uffolettravierzo,
Vraccenervuse, e che da pietto appena
Vedeno chello che le vene a bierzo
D’otto piede, doie capo, e ssenza mano,
Grance chiammate, e a chi resiste è nvano.
Ora chiste no ttanto llà arrevate,
Ch’a ffa se danno, e le bucche a ttenaglia
’Nn opra mettenno, a li Ziozio stroncate
So code, piede, e granfe; e la canaglia
No ppe cchesto a le primme se sgomenta,
Ma no gran fruscio a spate l’appresenta.
Ma che buò mo, ca le acosaccolare
’N facce a chelle cozzostreche predette
Tutte chiegà le bide, e strozzellare?
Tanto la sciorta guitta o vò, o premmette.
Li surece mperrò, che chiù non ponno
Resistere, e soffrì chello non vonno,
Li sbentorate all’utemo spantate,
Tanto accideio vedenno, e ttanto aggrisso,
Senza manco toccà le rreterate,
De trotto appalorcià vecco, e a nnabbisso:
Cossì de chella guerra mmalorata
La scena se chiudìe co la jornata.
Scompetura.