L’utemo schitto, che mm’era rommaso,
L’uocchio deritto mio, e de la mamma,
Da sto munno mo mo bello m’ha rraso
Abbottaguoffole guitto co na tramma
Degna d’isso, che ’n miezo a no pantano
Portannolo affocaie co mmuodo strano.
Ppe chesto, alò compagne, all’arme tutte,
Ca tiempo è dde vennetta, e cchisto cuorno
No è cosa da tenerce: a sti frabutte
Dammo ’n cuollo, e llevammonce da tuorno
Sto frusciamiento: alò priesto marmammo.
Tutte senza pietà taccariammo.
Ste quatto parolelle accossì acconce
Facettero, che tutte comm’a llampo
Corzero a armarse, e simbè cierte scuonce
Stevano, Marte attizza a ccalà ’n campo,
Ll’arma de posta, e già ch’a isso mporta
De la guerra, non fa chiù ggatta morta.
Li cosciale le nzaja ’n primma a ffarse
D’ungole vierde a na starza de fave,
Che la notte passata a rrosecarse.
Erano state li manzippe brave,
Che a le stanfolle beilo adaso adaso
Se cavoza, acconcia, e attacca ogne marvaso.
Giacche, e ccorazze se ntosciaieno puro
De cuoreje de gatte scortecate
Co ttutta polezìa simbè a lo scuro,
E de paglia mvottite, e strafasciate:
Ppe scuto de locerna no vellicolo
Nvracciattero a ffa sarvo lo ventricolo.
Paggena:Opere inedite di varj autori - Tomo I (1789).djvu/203
Chesta paggena è stata leggiuta.
193
La Batracommiomachia
Op. Ined. T.I.
Ce
I
