Divina Commedia (Napulitano)/7
O forza! o forza de nu Sautanasso!
Co voce cupa Pruto stea alluccare,
E chillo ntiso tutto nchillo passo,
Mme dicette pe starme a confortare:
Chill'ommo llà paura non te faccia,
Forte comm'è ccà te farrà calare.
Pò s'avotaje a chella brutta faccia,
Dicenno: statte zitto lupo mio:
Tutta l'arraggia dinto a tte nne caccia.
De ire a lo ccupo avimmo nuje golìo;
Se vo accossì llà ncoppa, addò Michele
Cacciaje lo rebbellato contro a Dio.
E tale e quale ad abboffate vele,
Che cadeno si l'albero è spezzato,
Cade accossì la fera assaje crudele.
Dinto a la quarta scesa io fuje calato,
Piglianno cchiù la riva de li chiante,
Che lo mmale de tutte àve adunato.
Ah! Ghiostizia de Dio! Chi stipa tante
Fatiche e ppene, quante nne vedette?
A che la corpa strazia tutte quante?
Comme a Caridde, nega ll'arriciette
L'onne che rompe, quanno a n'autra ntoppa,
Ccossì la ggente ad abballà se mette.
Ed era cchiù che a n'autro pizzo troppa,
E a ll'una parte, e a ll'autra alluccanno,
Votavano li pise co la poppa.
Se tozzavano doppo, e pò avotanno:
Pecchè mme firme? uno l'addimmannava,
Mmente tu staje ancora rociolianno?
E ognuno pe lo piano se tornava
A no punto da llà cchiù allontanato,
E tanto forte isso porzì strellava:
Ognuno s'avotava pò arrevato
A ll'autra guerra pe lo miezo piano,
E io ch'avea lo core appaurato,
Dicette: Masto, dimme chiano chiano
Chi fujeno cheste ggente nchierecate
Che stanno mise a la mancina mano?
E isso: Tutte fujeno ccà cecate,
E cose storte stevano pe dire,
Che non ficero spese mmesurate.
Chi so la voce lloro fa capire
A lo piano venenno mmiezo a strille,
Addò la corpa pò li ffa spartire.
Cecate fujeno e non ànno capille,
E chiste songo Pape e Cardinale
Avare tutte quante a mmille a mmille.
E io: Sio Masto mio, nfra chisti tale
N'avarria a vedere quarcheduno
Che non soffrette maje de chisto mmale.
E isso a mme: De chisti ccà a ognuno
La vita scanoscente li nzozzaje,
Mo li cceca a ogne cosa a uno a uno.
Se darranno mazzate e ogge e craje,
E sempe, e da la fossa n'esciarranno
Senza capille ntra le pponie e guaje!
Nfra de lloro so state a mmalo danno
Malo tenè, mettute a chesta azzuffa,
Qua sia, ste ccose te lo diciarranno.
Mo, figlio mio, può vedere a uffa
Li bene commettute a la fortuna
Quanto durano, e come ognuno sbruffa!
Tutto l'oro che sta sotto a la Luna
O che già fuje, de st'aneme stancate
Non potarria farne sposare una
O masto mio, dimme, nfra cheste strate,
Chesta fortuna che tu m'assicure
Ch'è, che li bene tutte àve abbrancate?
E isso a mme: Che sceme criature,
Chesta gnoranzia è chella che v'affenne,
Chesta sentenzia mia mmoccate pure.
Dio, da lo quale ognuno già depenne
Fice li Ciele, dannove comanno,
Sì ch'ogne parte a ogne parte sbrenne!
La luce eguale a tutte parte dànno
Pure a la luce de lo munno nterra
Venette na Mastressa llà ordinanno
Che cagnasse li bene de sta terra
De gente a ggente, e a ssango ntutte l'ore,
Facenno a l'uman genere na guerra.
Pecchè na gente mperia, e l'autra more
Sentenno lo Jodicio de chessa
Che non se sape, e spisso è ngannatore.
Lo sapè vuosto non contrasta a essa
Lo regno sujo provvede nfra le branche
Comme fanno li Dieje sta cosa stessa.
Li cagnamiente suoje non so maje stanche
De pressa và, necessità la coce,
E vene spisso chi fa pile janche
Chest'è chella, ch'è tanto mesa ncroce
Pure da chi n'avria a dire bene,
Spannenno contro a essa mala voce.
Ma essa si è bìata, nò nce tene
Co l'autre primme criature allera
Spera sempe, e bìata se mantene.
Mo scennimmo a bedè d'autra manera;
Era notte, e ogne stella già saglieva,
Tanto che a restà llà cosa non era.
Jettemo a l'autra riva addò nce steva
Na fontana menanno acqua vollente
Pe dinto a na fossata, addò traseva.
L'acqua era scura e sempe cchiù perdente;
E nuje llà ncompagnia de l'onne bigge,
Jettemo pe na stata differente.
Una paluda fa, de nomme Stigge,
Sciumara brutta che accossì n'è scesa
Ncoppa de chelle sponne che so grigge.
E io che lo guardava, appena ntesa,
Gente nfangate vedde a li pantane,
Annude tutte, e co la faccia affesa.
Se vattevano cheste co le mmane,
Co la capo, lo pietto e co li piede,
Co li diente stracciannose da cane.
Lo Masto a mme: la vista toja mo vede
Aneme tutte ccà vinte da ll'ira
E cride pure, comm'a ognuno crede
Che sotto a l'acqua è gente che sospira
Tanto che st'acqua assomma e ffà lo fuosso,
Comme l'uocchio te dice addove gira.
Dinto a lo fango nfino a dinto a l'uosso
Diceno chiste: Fujeno arraggiuse,
E a l'aria triste, o piccerillo, o gruosso;
Mo nce mpesta chest'acqua qua schifuse.
Dicenno chesto la parola nzorca
E l'autre ncanna restano pò nchiuse.
E giranno accossì la fogna sporca
L'arco e la riva, l'uocchie già volanno
A chi dinto a lo fango ngrassa e sorca,
Nnanze a na torra nce trovajemo tanno.