Paggena:La Divina Commedia Napoletano Domenico Jaccarino-Nfierno.djvu/36

— 38 —

CANTO SETTEMO ARGOMIENTO

Dante arrivato a lo quarto piano, trasenno trova Pruto comme guardiano, e commannante de lo stisso. Doppo de le pparole de Vergileo, potenno trasì cchiù dinto, vedo l'amuruse e l'avare menarese l'uno contro a l'autro pise gruosse assaje. Da llà passanno dinto a lo quinto piano, trova dinto a la palude Stigge l'arraggiuse e li sfaticate, chiste menannose da ccà e da llà; chille zeffunnate dinto a la stessa paluda: alla fine se trova abbascio de na torra.

O forza! o forza de nu Sautanasso!
Co voce cupa Pruto stea alluccare,
E chillo ntiso tutto nchillo passo,
Mme dicette pe starme a confortare:
Chill'ommo llà paura non te faccia,
Forte comm'è ccà te farrà calare.
Pò s'avotaje a chella brutta faccia,
Dicenno: statte zitto lupo mio:
Tutta l'arraggia dinto a tte nne caccia.
De ire a lo ccupo avimmo nuje golìo;
Se vo accossì llà ncoppa, addò Michele
Cacciaje lo rebbellato contro a Dio.
E tale e quale ad abboffate vele,
Che cadeno si l'albero è spezzato,
Cade accossì la fera assaje crudele.
Dinto a la quarta scesa io fuje calato,
Piglianno cchiù la riva de li chiante,
Che lo mmale de tutte àve adunato.
Ah! Ghiostizia de Dio! Chi stipa tante
Fatiche e ppene, quante nne vedette?
A che la corpa strazia tutte quante?
Comme a Caridde, nega ll'arriciette
L'onne che rompe, quanno a n'autra ntoppa,
Ccossì la ggente ad abballà se mette.