Divina Commedia (Napulitano)/31
Na stessa lengua morza assaje mme dette,
Tanto che de lo scuorno aggio lo mmale,
E ppò la mmedecina mme projette:
Accossì lo ffaceva tale e quale
Lo sio Achillo e lo patre che co llanza
Faceano triste e ppò buone riale.
E a lo vallone llà votammo panza
Ncopp'a lo monte che llesto p'attuorno,
Senza parlà lo lassammo mparanza.
Ccà nn'era notte, e manco nn'era juorno,
E la faccia mme jeva nnanze poco;
Ma sentette sonà lesto no cuorno,
Accossì forte, che pareva juoco,
Chè, contra a isso 'mbìa llà secotanno,
Jettaje ll'uocchie mieje tutte a no luoco.
Doppo la brutta secotata, quanno
Carlo Magno traduto nce abbuscaje,
Accossì fforte non sonaje Orlanno;
La capo io pò da llà poco àizaje,
Aute ttorre parette de vedere;
E io: addo stammo, Masto? addimmannaje.
E isso a mme: Tu àje mo da sapere
Ca si lontano vaje tanto a lo scuro
Pigliarraje gruosse sbaglie e co ppiacere
Tu vedarraje, si llà può jì scuro,
Comm'uno piglia sbaglie da lontano;
Perzò che tu mo staje nfaccia a lo muro.
Poje caramente mme pìgliaje la mano,
Dicenno: Primma mo che ghiammo nnante,
Azzò lo fatto tujo non pare strano,
Sacce ca non so ttorre, ma gialante,
Dinto a lo puzzo, e ffora ognuno è affritto,
Da la panza nfì abbascio tutte quante;
Comme, quanno lo tiempo è scuro e ffitto
La vista a ppoco a ppoco raffejura
Zzò che annasconne ll'aria nfra lo stritto.
Ccossì spercianno ll'aria grossa e scura.
Cchiù e cchiù arrivanno nfaccia de la sponna,
Scappa lo sbaglio, e vene la paura.
Pecchè comme a na rota tonna tonna
Tanta turre nce stanno qua corona,
Ccosì la prova che lo puzzo aonna,
Stevano justo mmiezo a la perzona
Chilli brutte gialante, che ammenaccia
Giove da cielo pure quanno trona.
De quarcheduno io già vedea la faccia,
Spalle, pietto, e de panza na gran parte,
E pe li scianche pure le ddoje vraccia.
Natura certo, quanno lassaje ll'arte
De sti tale anemale fice bbene,
Levanno chisti secondine a Marte.
O p'essa d'alifante e de bbalene
Non se pente, chi guarda attientamente
Cchiù ghiusto e cchiaro tutto cosa tene,
Chè, addove l'argomiento de la mente
S'agghiogne a mmala voglia a chella scossa,
Riparo non pò darece la ggente.
La faccia soja pareva longa e grossa
Comme la Pina de San Pieto a Romma,
E accossì grosse aveva isso l'autre ossa:
Sì che lo puzzo addò sta ggente nghiomma
Da miezo abbascio n'ammostava tanto
Da ncoppa, che arrivarece nn'assomma
De tre gruosse Frisune lo gran vanto;
Pecchè io nne vedea trenta gran parme
Da lo cuollo a la panza, e sento schianto.
Rafel mai amech zabi arme,
Accommenzaje la fera vocca a aprire,
Autro non potenno o dirme, o farme.
Lo Masto: Anema scema, stette a ddire,
Co lo cuorno te tiene e sta a sfocare,
Quann'ira o passione staje a ssentire.
La funa truove si te staje a ttoccare,
A lo cuollo attaccata, arma confusa,
Vì che lo pietto già te sta a nfasciare.
A mme dicette: Isso stesso s'accusa:
Chist'e' Nembrotto, pe lo quale 'nfammo
A lo munno una lengua non s'ausa.
Lassammolo sta ccà, non ne parlammo;
Pecchè ogne llengua a isso fa rammaggio
Comm'isso a ll'autre parla, e non curammo.
Facettemo accossì luongo viaggio
A mmancina votate, e assaje scojeto
Trovajemo ll'autro assaje cchiù fiero e maggio.
A piglià a isso, co lo Masto 'nfieto
Non saccio dì, ma isso aveva strinto
Da nanze l'uno e l'autro vraccio arreto
De na catena, ch'isso avea da dinto
Da lo cuollo nfì abbascio, e scommigliato
Lo riesto steva nfì a lo ggiro quinto.
Chisto superbo de sperienza 'ngrato
S'ammostaje 'mpotenzia contro a Giove,
Mme dicette lo Masto; e sta a sto stato.
Fiarte se chiamma, e fice le gran prove
Co li Gialante contro de li Dieje;
Lle braccia che mmenaje mo cchiù non move.
Io a isso: vorria, si se poteje,
Che de lo smesurato Biarrejo
N'avessero sperienzia ll'uocchie mieje.
Mme risponnette: Vedarraje Antejo
Da ccà che pparla sciuòveto e ammenaccia,
Mettennoce a lo funno d'ogne rrejo.
Chello che buò vedè nce sta de faccia;
E comm'a chisto è fatto e sta attaccato,
Sulo cchiù brutto assaje te pare nfaccia.
Terramoto non fuje tanto tremmato,
Che smovesse na torra accossì fforte,
Comme Fiarte fice assaje sforzato.
Paura avette allora de la morte,
E de farla fenì sperava ancora,
Si non avesse visto cose storte.
Cchiù nnante pò da llà jettemo allora,
E vedettemo Antejo gruosso cinco alle,
Senza capo a la grotta ascire fora.
O tu, che dinto a fortunata valle
Che grolia avette da Don Scipione,
Quanno votaje Ànnibale le spalle,
E portaste mille e uno lione,
E che, si fusse stato a l'auta guerra,
De li tuoje frate, ancora lo ciuccione
Vinto vorria li figlie de la terra;
Miettene abbascio, e non averne schifo,
Addò Cocio la freddezza nzerra.
Non nce fare ire a Tizio, nè a Tifo,
Chisto chello pò dà che ccà s'abbramma;
Mperò t'acala, e non sentì sto zifo.
A lo munno te pò spànnere famma,
Che ccampa, e llonga vita ancora aspetta,
Si nnanze tiempo grazie non lo chiamma.
Lo Masto zzò dicette, e qua saetta
Chillo s'acchiappa llà lo Masto mio
Comm'Ercole sentette già gran stretta.
Sentennose piglià Vergilio pìo
Dicette: a ffianco a mme statte venenno,
Pò fice che no fascio era isso e io.
E a guardà Carisenda chi sta jenno,
La vede storta e quase llà abboccata,
Tanto che da no lato va pennenno;
Antejo llà mme pareva a la spartata
E acalanno se steva, e io pò tanno
lire avria voluto p'autra strata;
Ma a lo funno da llà nce va accostanno,
E nfra Giuda e Lucifero posaje,
Ma llà non stette assaje tutto acalanno,
E comm'arbero lesto s'aizaje.