Paggena:La Divina Commedia Napoletano Domenico Jaccarino-Nfierno.djvu/136

— 138 —

CANTO TRENTUNESEMO ARGOMIENTO

Li Poete scenneno abbascio a lo nono circolo, addove se casticano quatto specie de tradeture. Ma dinto a chisto canto Dante ammosta solamente che trova attuorno a lo stesso circolo cierti gialante, e co lloro Antejo, da lo quale fuje acalato a lo funno d'isso circolo.

Na stessa lengua morza assaje mme dette,
Tanto che de lo scuorno aggio lo mmale,
E ppò la mmedecina mme projette:
Accossì lo ffaceva tale e quale
Lo sio Achillo e lo patre che co llanza
Faceano triste e ppò buone riale.
E a lo vallone llà votammo panza
Ncopp'a lo monte che llesto p'attuorno,
Senza parlà lo lassammo mparanza.
Ccà nn'era notte, e manco nn'era juorno,
E la faccia mme jeva nnanze poco;
Ma sentette sonà lesto no cuorno,
Accossì forte, che pareva juoco,
Chè, contra a isso 'mbìa llà secotanno,
Jettaje ll'uocchie mieje tutte a no luoco.
Doppo la brutta secotata, quanno
Carlo Magno traduto nce abbuscaje,
Accossì fforte non sonaje Orlanno;
La capo io pò da llà poco àizaje,
Aute ttorre parette de vedere;
E io: addo stammo, Masto? addimmannaje.
E isso a mme: Tu àje mo da sapere
Ca si lontano vaje tanto a lo scuro
Pigliarraje gruosse sbaglie e co ppiacere
Tu vedarraje, si llà può jì scuro,
Comm'uno piglia sbaglie da lontano;
Perzò che tu mo staje nfaccia a lo muro.