Divina Commedia (Napulitano)/13

'A Wikisource.

[p. 61 càgna]

CANTO TRIDECESEMO
ARGOMIENTO
Trasuto Dante dinto a lo secunno piano vede li violente contro a lloro stesse trasformate a arbere, ncopp'a li quale vanno ll'arpie; e vede pure li violente a danno de li bene lloro, secutate da na chiorma de cane femmene ntra li quale canosce Lano Senese e Ghiacopo Padovano. Da Pieto Delle Vigne sente la causa de la morta soja, e comme ll'aneme se trasformano a trunche d'arbere. Sente a ll'urdemo da no Sciorentino l'affriziune de la patria, e pecchè da isso stesso se 'mpennette.


Non era ancora llà Nesso arrivato,
Quanno jammo a no vuosco pe la valle,
Che da nisciuna strata era signato.

[p. 62 càgna]

Non frunne verde, sulo scure e gialle,
Non rame belle, ma nòdeche nere,
Frutte gnernò, ma spine fatte a ppalle.
Non ànno streppe tanto brutte, fere
Sarvaggie che giranno sempe stanno
Nfra Corneto e Cecina pe piacere.
Lo nido lloro brutte Arpie ccà fanno
Che ne cacciajeno allora li Trajane,
Coddicenno nfuturo tristo danno.
Co larghe scelle, e co le ffacce umane,
Ogne a li piede e penne pe le ppanze,
De l'arbere lamiente fanno strane.
E lo Masto: Mo primma a farte nnanze
Sacce che staje a lo secunno girone,
E pò te trovarraje ntramente scanze
Pe dinto a lo cchiù brutto Sabbione;
Ma guarda buono e lesto vedarraje
Quanto zzò che te dico è co ragione.
Sentea da tutte parte piccie e guaje
E non vedeva chi llà lo ffacesse,
Tanto che strallunato mme fermaje.
Credo ch'isso credette ch'io credesse
Ch'ascessero le vvuce da le ffrunne
Da gente che da nuje s'annasconnesse.
Mperò disse lo Masto: Si tu ammunne
Quarche frasca da ncopp'a cheste piante,
Chello che pienze jarrà a li sprofunne.
Tanno la mano io cchiù mettette nnante,
Tiraje no ramo da no gruosso pruno,
E lo trunco strellaje: Pecchè me schiante?
Da che fatto fuje pò de sango bruno,
Strellaje: pecchè tu scippe a mme nfra tutte,
Non sentiste piatà maje pe nisciuno?
Simmo uommene, ma streppe mo arreddutte,
La mano toja non pia cchiù mo nce perde,
Simbè fossemo sierpe o farabutte.

[p. 63 càgna]

Comme s'arde no ligno ancora verde
E va da sotto ncoppa e tutto 'nzeva,
E schioppa, a lo viento non lo sperde.
Accossì nzieme llà lesto n'asceva
Parole e sango, tanto che la cimma
Fice cadè 'mpaura mmentre steva.
Sì credere avarrìa potuto apprimma,
Risposeme lo Masto, anema lesa,
Chello ch'à visto co sti vierze a rrimma
Non avarria la mano a tte mo stesa;
Ma lo fatto l'à fatto lesto fare
Na cosa che a mme stesso pure pesa.
Dille chi fuste, e mmece a sto parlare
De te dicesse mo porzì quaccosa
A lo munno, addò s'àve da tornare
E lo trunco: La voce toja azzeccosa
Me fa parlare mo de sta manera,
Pecchè voglia m'àje data a ffà sta cosa.
Pier delle Vigne io songo che primm'era
A Feterico Mperatore caro,
Nfì che la mmidia non lle fice cera.
De li segrete suoje non era avaro
E tanta fede e tanta lle portaje,
Che la morta n'avette a pparo a pparo.
La mmidia che a Cesare guardaje
E lle jette addavero justo ntuzzo
Pecchè a le Ccorte chesta se mpestaje
Contro me scatenaje la ggente a mmuzzo,
E contro a Feterico poco appriesso,
L'annore fatto fuje chianto a selluzze.
E ll'arma mia pe gusto de cepriesso,
Credennome fa buono a darme morte
Me fice judecà contro a me stesso.
Pe le rràreche nove de chist'uorte,
Ve juro che fedele io fuje de funno
A lo signore mio pe bona sciorte.

[p. 64 càgna]

Si quarcuno de vuje torna a lo munno
De me parlasse comme se commene,
Ca la mmidia me mannaje a sprofunno.
Doppo no poco disse: Mo che ttiene
La lengua a siesto non perdimmo ll'ora
Ma parla e falle dì tutte ste ppene.
E io a isso: Tu addimmanne ancora
De chello che piacè le ò pe poco,
Ch'io non potria, ca sto piatuso a st'ora.
E dicette porzì: si isso dà luoco
A ffà chello che dice, e pesa e spacca,
Spireto ncarcerato ntra lo ffuoco,
Dince mo comme l'anema s'attacca
Co ste nnodeche, e dince mo si puoje
Si quarcheduna se ne scioglie e ammacca.
Tanno sciusciaje lo trunco forte, e poje
Lo viento addeventaje lesto na voce:
Breve breve ve sarrà rispuosto oje.
Quanno se parte l'anema feroce
Da lo cuorpo da dò s'è sdradecata
Menuos la manna a la settema foce.
Dinto a lo vuosco cade a la spartata,
Ma addò la sciorta la sbalestra a mmiglia
Cresce comm'a biava semmenata.
Esce sottile e ppò sarvaggia sguiglia
L'arpie le ffoglie si magnà vedimmo,
No dolore da llà lesto lle piglia.
Comm'a ll'autre ccà nuje venarrimmo,
Ma non però li cuorpe ccà vestenno,
Ca chello che lassajemo nn'avarrimmo.
Portannole pò ccà, pe quanto ntenno,
Li cuorpe nuoste appise ccà sarranno,
Ognuno a ll'arbosciello sujo venenno.
A lo trunco nuje stevamo aspettanno
Credenno ch'autre me volesse dire,
No rummore sentimmo justo tanno.

[p. 65 càgna]

Comme a chillo che sta a vedè venire
Lo puorco co la caccia a chella posta,
Co le bestie le frasche sta a sentire.
Teccote duje da la senistra costa
Sceppate e annuda, ma fujenno forte,
Ca lo fracasso parea fatto apposta.
Chillo nnanze; Mo curre, curre morte
E l'autro, a quale parea tardà troppo
Strellaje: Lano, si non fujeno accorte
Le ggamme toje a le ngiostre de Toppo
E, pecchè se rejeva ammalappena,
D'isso e no trunco se fice uno cuoppo.
Arreto a lloro era la serva chiena
De cane nere ch'erano arraggiate
E ffuìre pareano la catena.
A chillo llà annascuso mozzecate
A'nno ggià chelle ccarne, e a tanta guaje
Da llà co lloro se l'ànno portate.
La guida pe la mano mme pigliaje
Mostannome che l'arbero chiagnea
Pe la rottura che lo 'nzanguinaje.
O Jacopo, dicea, da Sant'Andrea,
Che t'è giovato darme sto tormiento?
Che corpa aggio io de chesta vita rea?
Jenno lo Masto ncuollo a isso attiento,
Disse: Chi fuste che pe tanta site
De lo cuorpo mo suoffre e faje lamiento?
E chillo a nuje: o arme che venite
A vedere lo strazio poco aonesto
Che m'à menato addò mo me vedite,
Guardate buono mo porzì lo riesto.
Io fuje de la cità che a lo Battista
Cagnaje primma patrone, onne pecchesto
Sempe co ll'arta soja la farrà trista,
E si non fosse che pe l'arno siente
Rummanè d'isso ancora quarche vista,

[p. 66 càgna]

Li cittatine che li fonnamiente
Da capo n'autra vota llà facette
Non n'avarriano cchiù cacciato niente.
Accossì io pigliaje e me 'mpennette.