Paggena:La Divina Commedia Napoletano Domenico Jaccarino-Nfierno.djvu/64

— 66 —

Li cittatine che li fonnamiente
Da capo n'autra vota llà facette
Non n'avarriano cchiù cacciato niente.
Accossì io pigliaje e me 'mpennette.

CANTO QUATTUORDECESEMO ARGOMIENTO

Li Poete arrivano a lo terzo girone, addò trovano a lo prencipio na campagna d'arena cocente. Li violente contro a Dio, contro a la natura e contro a l'arte ccà songo trommentate da sciamme abbrusciante assaje che lle chioveno ncuollo. Nfra li primme Dante vede Capaneo; pò trova no sciummetiello de sango, e appriesso na statua, da la quale chisto esce nzieme co ll'autri tre sciumme nfernale. A la fine vanno da na parte a l'autra de lo campo d'arena.

Pò che la carità de do so nato
Me stregne, auno chelle fronne sparte
E lle ddò a chillo ch'era già abbrucato;
Pò venimmo a lo fine addò se parte
Da no girone a ll'autro justo, addove
Se vede la Jostizia la brutt'arte.
A mmeglio fa capì le ccose nove
Arrivammo a no vuosco a chella bbanna,
Che le ppiante da terra scippa e smove.
La serva addollorata ll'è ghirlanna
Attuorno, comme co essa fà lo fuosso,
E nce fermajemo ccà ma a rranna a rranna.
Nterra nce steva arena, aceno gruosso,
Ed era accossì tosta ed auta tanno,
Ch'a Catone avria rutto lo spercuosso.
O vennetta de Dio, e quanto e quanto
Tu àje a esse temuta da chi legge
Chello ch'a ll'uocchie mieje già dette vanto.
D'aneme annude io vedde tanta gregge
Che chiagnevano tutte amaramente
E pareva ch'aveano n'autra legge.