Canzone e Ariette nove/Canzone nove/Ncop' 'o palcuscenico 'e l'Eden
Ncop’’o palcuscenico 'e l’Eden.
— Si te vengo a sentì quacche sera,
quanno cante e tte sbatteno ’e mmane,
si addeviente cchiù ghianca d’’a cera
nun appena me vide spuntà,
che vo’ di’?… Ma tu ’o ssaie! Tu mm’’o ddice
cu sta voce ca tremma ogne tanto…
Ride! Abballa!… E pur io veco ’o chianto
dint’a st’uocchie lucente passà…
Ma comme, comme?! Ma dimme…
Nun t’’e ricuorde ’e serate
quanno — int’a ll’ombra d’’e strate
sulagne —
tenennote ’a mano
nzerrata inta mia —
cantavemo nzieme p’’a via…
Vieni — e riposa
la fronte qui, sul mio cuore…
Cuor che non osa,
ma trema d’amore…
Te chiammave Assuntina «’a pupata»
Ire onesta... Ire sarta vitosa...
E mo, tutto na vota, sciantosa!
E te chiamme Fioretta Bijou!...
. . . . . . . . . . . . . . . . . . . . . . . . . .
. . . . . . . . . . . . . . . . . . . . . . . . . .
— No, no!… Basta!…’O bbi’ ccà… Mo mme vesto…
Mo mme metto nu sciallo e tt’arrivo!…
Llà — ’o puntone d’’o vico ’e Baglivo…
Comme a primma!… Nu zumpo e sto llà!…
Ma pure mo… comm’a primma…
Mm’e’ ’a tenè strenta… afferrata!
Mo… dint’a ll’ombra ’e na strata
sulagna,
mo scòrdete ’a mano
ca io nzerro int’’a mia!
E canta — e cantammo p’’a via…
Vieni — e riposa
la fronte qui, sul mio cuore…
Cuor che non osa,
ma trema d’amore….
This page was moved from . It's edit history can be viewed at Chiàcchiera:Canzone e Ariette nove/Canzone nove/Ncop' 'o palcuscenico 'e l'Eden