Paggena:Teatro - Aniello Costagliola.djvu/188

'A Wikisource.
Chesta paggena nun è stata leggiuta.
— 178 —
Cantalupo è nu giovene cumpito: e canosce bene ll'ubbricazione soia. (Breve pausa). Una cosa nun mm'arricordo: fino a ddo' nce acumpagnaie?
Carmela (subito:) — Fino a sotto 'a porta: t'aiutaie a ssaglì 'e ggrade... e se ne iette... se ne iette...
Michele (nervoso, ostentando calma:) Ah!... Se ne iette?... Mme rispiace... Puteva trasì... 'A casa nosta sta sempe a disposizione degli amici. E Ninuccio Cantalupo è n'amico. (Pausa. Poi, simulando sorpresa:) E tu... nun saccio comme te veco... Staie tutta sbattuta... Triemme tuttaquanta... Capisco: t'aggio scetata 'a ntrasatto... Va trova che te stive sunnanno...
Carmela. — Niente. Niente.
Michele. — Io pure mme so' sunnato. Aggio durmuto 'n terra tutt''a nuttata; e se dice ca quann'uno dorme fore lietto fa brutti suonne. Ha da essere overo, pecchè 'n zuonno, aggio visto cose ca mm'hanno fatto stravedè. (Accostandosi impercettibilmente a lei, che si rincantuccia sempre di più). Mm'hanno fatto stravedè! (Scandendo le sillabe:) Mm'è paruto comme si nu mariuolo — nu mariuolo sulo — se fosse mpezzato cca, 'int''a casa mia. E mm'è paruto comme si stu mio signore nun fosse venuto pe mm'arrubbà 'a robba d''a casa... pecchè canusceva a fondo ca so' nu poverommo, e tengo sulamente ll'uocchie, pe chiagnere!... Capisce? Stu mariuolo è trasuto cca... pe mme fa' nu sfregio... pe se levà na preta 'a 'int''a scarpa... pe mm'arrubbà na cosa... (Con aria di mistero:) Na cosa ca io nun carculavo cchiù, pecchè già mm'era stata arrubbata na vota; ma ca tenevo ancora astipata, p'ammore d''e ccriature... Embè: se dice ca 'o suonno è na fantasia; eppure stu suonno mm'ha lassato na mpressione comme si fosse stato nu fatto succieso...
Carmela (agitata, segue le parole di Michele con trepidazione crescente).
Michele (quasi a contatto di lei:) — E guarda 'a cumbinazione... Mme sceto, e me trovo cuccato 'n terra... Mme soso, e veco 'o pizzo 'e lietto mio ammaccato... (Cupamente:) Comme se spiega stu fatto, si nun mme so'