Chesta paggena nun è stata leggiuta.
te cride? Nun songo io. A menta fredda, — guarda, — quacche bota te cumpiatisco, pecchè penzo, fra me e me: «Povera dia! Ll'ha fatto p''o figlio: pe fìgliemo». Ma, quanno te sto' vicino, io mme veco 'into l'inferno; e si te putesse accìdere annascuso, nun te darrie manco 'o tiempo 'e di': «Gesù, aiuteme!»
Carmela (recisamente:) — E allora, spartìmmece...
Michele (subito, con un moto di terrore:) — Pe ce mettere mmocca a' gente?!
Carmela. — Cacciammenne!
Michele. — E chelli tre àneme 'e Dio?
Carmela (in uno scatto di passione materna, affannosamente:) — Ma è pe loro ca nun t'aggio lassato anfino a mo!
Michele. — 'O ccapisco.
Carmela. — È pe loro ca te voglio!
Michele (inflessibile:) — No!
Carmela. — So' figliola... Tengo ventisette anne!...
Michele. — Io nun so' Stefano 'o nzìpeto, co 'o ssape e ce passa pe ccoppa. Nun so' zi' monaco, ca va cuntanno 'e ccorna soie a chi nun 'e bo' sapè. Io te voglio cu mmico. Sempe cu mmico. Nnanz'a' gente un amorcunzente; 'int''a casa, comme si nun ce fóssemo maie canusciute. (Concitatissimo): È fissazione? E sissignore! Ma pe sta fissazione io nun te scannaie, e nun te voglio lassà. È sta fissazione ca mm'ha fatto turnà sotto 'a sferza 'e 'on Prospero, cu na tagliata 'n faccia. Isso mm'ha mannato a chiammà cu na scusa? Io so' turnato, cu na sciurdezza... È fissazione? È fantasia? E vabbè! (Le mani nelle saccocce dei calzoni, sempre concitato, passeggia).
Carmela (velenosamente:) — È nu sacrileggio!
Michele (di rimando, arrestandosi:) — È nu sacrileggio? Sissignore! E chi 'o ssape meglio e me? Io sto' assaggianno 'e martìrie 'e Giesucristo! Fatiche: e te truove faccia affronte cu nu femmenella, ca te fa ceremmònie per rifresso 'e mugliereta. Tuorne a' casa: e te truove nnanze a na femmena ca te dorme vicino e tu ll'avuote 'a faccia. Che bita!.. E che catena!
