Chesta paggena nun è stata leggiuta.
(Incallito nella sua viltà, Stefano non si scuote).
Michele. — E ca chesto mme dispiace! Cu ll'uómmene se parla 'e n'ata manera!
Stella. — E parla! Parla! Nun guardà 'a vunnella! Io te pozzo dà surisfazione!
Michele. — Vattenne! Nun mme fa' parlà! (Indicando la porta:) Fore! Ascite fore! Nuie, puverielle e buono, ce sputammo ncoppa a sti ciente lire voste!
Stefano (ha assistito come un ebete all'alterco. Ora, si alza lentamente, borbottando:) — Ebbiva 'o cumpare! Ce ne caccia! Ebbiva!
Michele. — E ringrazia a Dio ca te ne caccio schittamente! Tu te mmeretarrisse pàcchere a botavraccio!
Stella (stizzita:) — Ah! Tu t'apprufitte ca marìtemo nun te po' currispónnere? T''o manno io, 'o paraggio!
Michele. — E quanno? e quanno? Mànneme a Totonno 'o calavrese, a Lucariello 'o bàbbaso, 'o capitano Balestra... Che saccio! Tu tiene tanta prutetture!
Stefano. — Làvete 'a vocca! 'E nomme 'e sti belli signure, mmocca a te?!
Michele (al colmo dell'eccitamento:) — Belli signure! Belli signure, ca vèveno acquavite e te riàleno corna!
Stella (sconcertata, per impedire che Michele prosegua, afferra Stefano e lo spinge verso l'uscio di scala:) — Cammina! Cammina!... E muóvete! (Avviandosi, per uscire:) Sta casa nun è fatta pe nuie. Cca ce sta na santa: e 'addore 'e ncienze ce fa venì relore 'e capa! (Accenna con l'occhio a Carmela).
Michele. — 'O può dicere forte, 'o ssa'!
Stefano (uscendo, appoggiato al braccio di sua moglie:) — Ebbiva 'o cumpare! Accussì rispetta 'o sangiuvanne!
Stefano. (di fuori, ripete mollemente:) — Accussì rispetta 'o sangiuvanne! Ebbiva!
