Salvatore
(retrocedendo con terrore) No!… No!… E ’o figlio mio! Nun è ovèro! E ’o figlio mio! (a mani giunte, balbettante, sperduto) Siente, si tu ’o ffaie… Si tu mme dice chesto… ’Sta cosa terribele, pe mme fa’ spartere… Siente… No! no! Nun pozzo… Sulo cu ’a morte!
Nannina
(manda un ruggito) Sulo c’ ’a morte?!… (s’avventa addosso furibonda, gli afferra un braccio, lo morde a sangue)
Salvatore
Ah! Lassa… Lassa… E lassa! (con un urto violento si scioglie da lei, la spinge lontano, sul cassone) Sulo cu ’a morte, sì! (il viso s’illumina, ne la voce gli trema un singhiozzo disperato) Te cride p’essa? Nun mme ’mporta d’essa. Sì, mme ’mporta; ma mme ’mporta pecchè s’io ’a lasso, chella mme leva ’o piccerillo! M’annèia, capisce?!… E sarrìa capace! E ’nfama! Mme leva chella criatura, e io pe chella criatura campo! (si passa convulso le mani su gli occhi, su la fronte, geme) Ah! tu nun puo’ sape’… che delóre! Che murtificazione! Te cride ca i’ nun soffro ’e te vede’ accussì?! Dio ce ha vuluto castiga’! Nun nce àie colpa tu… No! Nun nce aggio colpa io!… Io dicevo: Chi ’o ssape, po essere c’ ’o Signore appriesso ce benedice! Niente! (ghigna rabbioso) Niente!!! Ahi che friddo ’int’’a sta casa mia… Mme
