Vorria scommettere
Ca cchiù de doje,
So vuo’ magnarete,
Non te ne puoje,
Pecchè te saziano;
So de sostanza,
E fanno jenchere
Bona la panza!
Songo de papare ec.
Chi lle po tenere,
Accossì grosse,
Fresche, majateche,
Vollente e rosse!
No, non c’ è n’autro,
Che te po dà,
St'ova de papare
Chetengo ccà!
Songo de papare ec.
A li dudece ottobre songo nato,
A lo trentuno abbascio a lo Pennino,
Da Ntonio Chiurazzi l’avocato
Che de grieco era masto e de latino.
Co nomme do Luigio vattiato
Fuje, comm' a no frate mio cocino;
Non aggio maje sapute comme è stato
Che ad aspettà me steva sto destino,
D' avere pe compagna na mogliera,
Che quanno arape chillo cannarone,
Li strille caccia comme a na fochera;
Io la vorria sparà co no cannone,
Se non me mannariano ngalera.
Ah, legge, tu faie farme lo... troglione!
So corporento e de bona salute,
Simbè facesso friddo sto nfocato;
Li pile janche nfaccio me so asciute;
La varva è chiena e lo naso è allargato.
L' uocchio so nire e le ciglia affollute;
Lo fronte è lario e gruosso ed è schioccato;
Li diente non sò scritte e nè zannute;
Lo viso a quarche parte s’ è arrappato.
Nisciuna cosa tengo co difetto;
Lo cuollo non è sicco e non è chiatto;
La vocca non è grossa, e so brunetto.
Nzomma, non songo n’ ommo scontrafatto:
Sulo la faccia è comme a lo scozzetto;
Chisto è lo spiccecato mio ritratto!
|
Non songo ricco e manco sfasolato;
Nè cerco volè fa lo signorino;
Non me ponno chiammare scrianzato;
Rispetto lo lontano e lo vicino.
Non songo goliuso a cagnà stato,
O tengo o se non tengo lo carrino.
Pe mè, vaco facenno lo criato,
Pe ghì accattanno pane, carne e bino.
Vaco vestuto comme a n’ ommo antico;
Quanno cammino pare n’ alloccuto,
Nè me n'addono se passa n’ amico.
Ma a lo parlà so sempe resoluto!
E zzò che tengo ncore tutto dico..
Va chià!... ca lo sonetto e già scomputo!
Songo nfernuso, e tengo no cerviello
Ca quanno ncoccio è pevo de na vreccia.
La lengua nchiova, comme a no martiello
Te fà, te sfà, te scioglie, attacca e ntreccia;
Vorria mangiare co no sordacchiello.
Avè lo buono e de scartà la feccia;
A lo viecchio, se fa lo guaglionciello,
Lle menarria lo nniro de la seccia.
Co lo niozio songo trascurato;
M’attacco ncostiune co pagliette,
Vorria alluccare e tengo poco sciato.
Lasso lo pane è magno li confiette;
Me lagno sempe d' esserme nzorato;
E chiste tutte so li mieje difiette!
Oh, signò Quarajesema vecchia
De la strata e arrivata a mmità;
E lo puopolo già s' apparecchia
A bolerla pe miezo spaccà;
Seca seca molleca molleca;
A la sacca chi tena manteca.
Li diune perfette nzi a mmone
Songo assaie ma parlo pe me;
E atettante de farne soppone
Cchiù perfette; e ssapite pecchè?
Seca seca molleca molleca;
Pecchè ncuollo non tenco manteca.
Ca so venneno arenche, sarache,
Stoccofisso o porzì baccalà;
Chi li pote accattare? ste brache;
Pozzo schitto sorchianno addorà.
Seca seca molleca molleca;
Non ce sta la sonante manteca.
|
