Chesta paggena è stata leggiuta.
61
sunettiata
MALAÙRIO
(na bizzoca pazza)
— Trasitevenne dinto; sta chiuvenno!
Nzerrate 'a porta e jateve a cuccà!
È da paricchio ca v' 'o sto dicenno,
ca chesta è n' ora brutta, chesta ccà!
È ll' ora c' 'o demmonio va trasenno
dint' 'e ccase d' 'a gente pe tentà!
Trasitevenne, jateme sentenno!
Cchiù fora nun ve state a ntallià!
M'è cumparuto San Giuvanne a Mare!
M'ha cunfirate brutti ccunfirenze!
Pe nuie sarranno assai lacreme amare!
Pesta, guerra, culera, carestia,
cu 'o terramoto e tutt' 'e cunziquenze...
Trasitevenne rinto!... Avummaria!
