Chesta paggena è stata leggiuta.
156
poemetti del cuore
Embè, cu sti ghiurnate ’e primmavera,
che ssaccio, mo’... me dà fastidio ’o sole!
Tutta sta luce pare notta nera:
tutta sta gente, ca cuntenta va,
pare ca jesse, cu na torcia ’e cera,
e purtasse nu muorto a sutterrà!
E stu mare, lucente e mbrillantato,
cu tutt’ ’e vvele preparate a festa,
bello e cuieto e tanto culurato,
me pare c’ aspettasse na tempesta...
E me pare, che ssa’, c’ a poco a poco,
tutto stu bello s’ avesse ’a cagnà,
e c’ avesse, accussì, chiovere fuoco,
e ca tutto s’ avesse ’a zeffunnà!
