II.
So' ghiuto passianno p' 'a Marina,
aggio ncuntrata a na venezziana.
Pe nomme se chiammava Sarrafina,
steva a servì cu na napulitana.
Teneva na faccella fina fina
e na manella ca nun era mana;
na vocca rossa comm' a na curvina
e cierti dentezzulle 'e purcellana.
Venezzianella mia, quanto si' bella,
Venezzianella mia quanto si' ccara!
L' aggio sagliuta int' a na carruzzella,
e aggio ditto 'o cucchiere: — 'A Zurfatara!
'O cucchiere s' ha fatta 'a resatella
e ha ditto: — Overo ch' è na cosa rara!...
L' aggio arrispuosto: — Nun fa 'o farenella!
Si nce hai che di', dimme 'a parola chiara!
Vi' quanto m' è custata chella mpesa!
Tanto na pezza 'argento, sana sana!
Magnava peggio du nu cane 'e presa...
Ebbiva a essa, sta venezziana!...
M' aveva appriparata sta surpresa!
Tu vi' che ffiglia 'e bbona crestiana!
O turca, 'a santa femmena, o francesa,
songo tutte 'e nu pilo e d' una lana!
