Paggena:Poesie napoletane - Ferdinando Russo.djvu/107

'A Wikisource.
Chesta paggena è stata leggiuta.
105
poemetti del cuore


Dincello tu, si st 'anema pentita,
tanto scuieta, amariggiata e sola,
nun se perdesse e abbandunasse 'a vita
               pe na parola!

Dincello tu, si cu na vocca amara,
— comm' a chi p' 'e desierte s' è sperduto
e se ricorda 'e na perzona cara
               e chiamma ajuto, —

nun l' ha chiammata, nun l' ha suspirata,
nun l' ha chiagnuta e nun l'ha ditto 'e ppene,
murmuranno, cu 'a voce appassiunata:
               « Te voglio bene! »

Che bene 'e core! Che nuttate amare!
Quant' ore triste a suspirà suspire!
Che sentimento, cuntemplanno 'o mare!
               Che suonne nire!

M' 'a ricurdavo, bella e malamente,
ridere attuorno cu chill' uocchie 'e ciele;
cammenà, scarpesanno 'e sentimente,
               bella e crudele!