Chesta paggena è stata leggiuta.
55
'o funneco verde
III.
— Giesù! — Sentite appriesso… Io nun murette
chella matina, donna Rosa mia,
proprio pecche lu cielo nun vulette…
Fosse morta, cummà, meglio sarria!
Basta, la lengua ncanna me scennette
e cchiù la voce nun truvaie la via,
tanto, cummara mia, ca me credette
ca fosse quacche tocco… — Eh!… Arrassusia!
— Che ll’avisseve ditto?… Io sola, sola,
vecchia mputente, che puteva di’?
Nun rispunnette manco na parola.
E li ccose fernettero accussì…
Ma… a vuie pozzo parlà… Mbè, rispunneva
malamente… e si chella me vatteva?
