Paggena:Opere inedite di varj autori - Tomo I (1789).djvu/19

'A Wikisource.
Jump to navigation Jump to search
Chesta paggena è stata leggiuta.
8
STANZE ec.

Po te nne jive pe la rua Francesca;
   Pe cchelle pporte de le Cantatrice
   (Tann’era vivo Francisco Maresca)
   Co ttanta suone, che tiempo felice!
   E co chelle ffontane d’acqua fresca,
   Co chelle gente guappe cantatrice
   Tozzolejanno co ffesta, e co gioja,
   Lo canto se sentea nfi a Sant’Aloja.
Tann’era magnà ’n chella vecchia aitate,
   Che maie mancaro tuortene a l’ancino;
   Jive co ll’oro ’n mano pe le strate,
   E non trovave sbirro, o marranchino.
   Chelle ssemmente so tutte mancate,
   Co chille Capodanne, e Sammartino;
   Mo regna chella gente a senzo mio,
   Che n’hanno fede a lloro, e manco a Ddio.
E mo Napole mia bella e gentile
   Si ghiuta ’n mano a ttant’ausorare,
   Quant’ jere bella sì ttorgata vile,
   E baje sperta cercanno sanzare.
   Io da la varva mme scicco li pile
   Ca te veo da sti lupe laniare,
   Peo sì ogge, che non fuste jiere
   ’N mano de pisciavinnole, e bucciere.
Non vedarraggio maje retornato
   Lo tiempo ch’iere, Napole, felice;
   Comme Fortuna va cagnamno stato,
   So ssecche chelle nnobele radice.
   Io stopafatto resto, anze ncantato,
   Ca Cajazza si ffatta da Fenice.
   Saie quanno fuste, Napole, corona!
   Quanno regnava casa d’Aragona.

Scompetura.