Dove sò le ccorreie co li mordante;
Ch’erano tutt’argiento martellato,
Tutte guarnute a pponta de ddiamante,
Co li cornette tutte appise a llato:
Lì Banche co montune d’oro nnante,
Ch’appena mo nce trovo no docato;
Tu non puoje ire mo pe nfi a lo Muolo,
Che n’ascie pe la via no marejuolo.
Dov’è lo tiempo de li Baccanale»
Li scisciole, freselle, e le mmagnose,
Li musece a cantà lo Carnevale
Co ccetole accordate a le bavose,
Co ll’autre cchelle tutte a li stivale
Co chille mazze de fronnelle, e rrose;
Fatta ch’aveano po la matenata,
Facevano na bella pretejata.
Dov’è ghiuta la festa de la Sceuza,
Li casatielle d’Isca, e le ppastiede,
Tant’abballà, che te dolea la meuza,
Contiente pe nfì a ll’ogne de li piede:
Mo che nce truove? solamente ceuza,
E mareve, e pporchiacche, e basapede;
Po faceano le grotte a Morgoglino
Co cciavarielle, e ppuorce, e meglio vino.
Le ffemmene la sera de San Gianne
Jevano tutte ’n chietta a la marina,
Altere se nne jeano senza panne,
Cantanno sempe maie la romanzina;
Mo, figlio mio, so trapassate ll’anne,
Che accossine nfurnave la farina;
Ogge è ssurto lo tiempo de li latre,
Che no nne puoie accattà doie meze quatre.
A 4 Po
