Ogne ffegura quanto maie ntrecata!
Mperzò tutta la gente che senteva,
’N cielo mastre, e descipole metteva.
Lo Rrè, e la Regina,
Ch’a sti fegliule vonno tanto bene,
Che comm’a pporcellana de la Cina,
O comm’a sceruppate.
Lo teneno guardate:
Fecero gran prejezza
Quanno lo juorno appriesso
Sentieno tutto chesso:
Ca le lodava ognuno a bucche chiene
De li Segnure ch’erano venute.
E co ragione mostraieno allegrezza;
Ca ’n paggiaria erano ben servute.
Ton. Viate a te! ch’aviste ssa fortuna.
Io primmo a sti segnure le stimava;
Pecchè sode, e modeste le bedeva,
O se a ppede, o ’n carrozza le scontrava:
Ma maie non me credeva,
Che fossero tagliate a chella luna,
Che fa prezzà li studeje, e la dottrina:
Mo che lo ssaccio, pe l’arma de vava,
Le voglio bene chiù, ch’a la cocina.
Mo pecchè baje? che nc’è fuorze quaccosa
Da paro lloro bella, e bertolosa?
Cian. E che te pare? fanno
Mo ch’è de Carnevale, no balletto,
Ch’è nnozente spassetto:
Ma fatto co ghiodicio
Co ggarbo, ed arteficios.
M
