Paggena:Opere inedite di varj autori - Tomo I (1789).djvu/15

'A Wikisource.
Jump to navigation Jump to search
Chesta paggena è stata leggiuta.
4
STANZE

Dove se trova maie tanta lianza!
   Lo marito sì ccaro a la mogliera,
   Che a mano a mano ntravano a na danza,
   Co chella ciaramella tant’autera:
   Vedive a chioppa a chioppa na paranza
   Co chell’ antica, e semprece manera:
   Lo viecchio a chillo tiempo era zitiello
   Co le brache stringate, e ’n jopponciello.
Chillo non era tiempo ammagagnato,
   Le ffenimene assettate mmiezo chiazza,
   Non c’era ommo ch’avesse parlato,
   Ca vernava ’n cajola la Cajazza.
   Chill’ommo, che ’n chill’anno era nzorato,
   Era tenuto pe gallo de razza:
   Ll’uno co ll’autro lo mostrav’a ddito,
   Chillo che passa mo, chill’è lo zito.
Chella co la gonnella de scarlata
   Portava perne grosse comme ntrita,
   La faccia senza cuoncio angelecata,
   Che te terava comm’a ccalamita.
   O vecchia, o zita, o donna mmaretata
   Parea che ffosse la Sia Margarita:
   Ogge ll’aie quatt’a grano comm’a ova,
   Nnante la festa nn’aie fatta la prova.
Li juoche, che ffaceano a Compagnano,
   A scarreca varrile, ed a scariglia,
   A stira mia cortina a mano a mano,
   A ssecutame chisto, para piglia:
   E po cagnanno juoco, o tiemp’nvano!
   Quanno nce perzo ll’arma s’assottiglia,
   Le ddonne a ppreta ’n sino, a ccovalera
   Tutto lo juorno nsino a notte nera.

Chelle