LO LUPINARO
CANZONE NAP0LETANA
Tutta la notte io misero
Pe vicole e ppe strate,
Vaco lupine a bennere,
Strillanno: so salate;
E tutte le nennelle
Sentennome strillà,
Lupine salatielle!
Mme corrono a chiammà.
Pe fa chest’arta ponteca
Nce vo fatica e stiento;
E io nce aggio sfizio,
E pure io so contento!
Ca jenno co la sporta
Sempe da ccà e da llà
Avuta aggio la sciorta
Na nenna de trovà.
Quanno la sera all’unnece
Passo pe lo Petraro,
Rosella mia dall’asteco
M’acala lo panaro!
Na vranca de lupine
Le porto a rialà;
Nce sceglio li cchiù fine
Pe farla addecrià!
D’ammore po parlannole
Me sto no pocorillo!
Le mengo nfra li spaseme
No vaso a pezzechillo!…
