Vicenzino — e detti.
Felice — Lo frate de Concettellà! meno male che non me conosce.
Ersilia — Uh! e comme ccà? m’aje ditto che non sarrisse tornato?
Vicenzino — (Entra e passeggia arrabbiato)—Niente, nisciuno de li duje aggio potuto avè mmano.
Ersilia — Vicenzì?
Vicenzino — Tengo lo veleno fino a li diente, la capo me v olle comme na caudara (vedendo Felice). Mall’arma de mammeta, lo pazzo!
Ersilia — Quà pazzo, chella è stato no momento d*abberrazione, mo l’è passata.
Vicenzino — Ah! neh? e sta buono?
Ersilia — Sicuro, ha parlato nfino a mo co me.
Vicenzino — Chillo pare lo scemis mio.
Felice — (Mo vene lo mbruoglio!).
Ersilia — Sì, dinto a chillo momento de pazzia se l’ha pigliato.
Felice — Già, aggio visto no scemis ncoppa a na seggia, aggio ditto mo me lo piglio.
Vicenzino — Chillo l’aveva trovato mmiezo a lo mercato.
Felice — No, ma io ve lo restituisco.
Vicenzino — Mo l'aje da portà allo saponaro.
Ersilia — No, chillo te lo paga, quanno s’arroina la rroba dell’aute s’à da pagà.
Felice — Sicuro io ve lo pago.
Vicenzino — Ma sto signore chi è?
Ersilia — Ah! chisto chi è... chisto è D. Mauriello di Casoria.
Felice — Io so D. Mauriello di Casoria. (dà la mano a Vicenzino.)
Vicenzino — D. Mauriello di Casoria, bravo!.. Ba^ta, io mo non tengo la capo a chesto. Mo vaco trovanno n’auta persona, e si l’aggio dinta a li mmane, lo voglio fa j a cascetta a l’omnibus!... Cielo mio, fammello trovà.
Ersilia — E chi è?
Vicenzino — No svergognato, n’assassino, ca si lo ncoccio (caccia il revolver) tu vide chisto? ccà nce stanno seje colpe, tutte dinta a la panza nce l’aggio da ficcà.
Felice — (A uso pinnole).
