D. Amalia. T’avive ’a zuffunnà sotto terra p’’o scuorno, e nun t’avive ’a fa’ vede cchiù!…
Rusella. Io speravo…. Io aggio sempe sperato, ’onn’Amà!….
D. Amalia. E tu ’o vulive bene?… Tu?…
Rusella. Sì, l’aggio amato, comme se po amà a Giesù!… E l’ammore d’Aniello m’aveva fatto addeventà n’ata vota comme a primma… V’’o giuro!
D. Amalia. Nun ghiastemmà!… Statte zitta!… Vattenne!
Rusella. Sempe ’a stessa femmena vuie; ma io ch’aggia di’ pe’ ve smovere?… Me vulite fa’ ascì pazza?… (Con preghiera). Donn’Amà, facitelo pe chi tenite mparaviso: perdunateme: so’ na povera sfortunata!
D. Amalia. Ma nun te n’adduone ca io sto’ tremmanno sana sana?… Ah, ca te vulesse sceppà ’o core ’a pietto, te vulesse!…
Rusella. Site senza core, site!
D. Amalia. Senza core, sì! Ma vattene ’a nanze a me, ca si te vedesse morta ’nterra te sputarria ciento vote ’nfaccia!…
Rusella. Facitelo… Dicite chello ca vulite vuie… Se ne sentette tante chillo Cristo beneditto… (Indica il Calvario).
D. Amalia. Vattene, auciello ’e mala nova, ’a nanze a casa mia!… Vattenne!…
Rusella. Me ne vaco; ma primma aggio ’a vedè Aniello… Io so’ venuta cca p’essere perdunata… E vuie me l’avite ’a fa’ vedè!…
