Assunta. Lassate ’o parlà, giuvinò!…
D. Vito. Ammeno se chiarisceno ’e ccose.
Gnesella. Na vota ca ce truvammo mo…
Taniello. Aniello, giovane onesto e faticatore, nun se puteva spusà Rusella, e st’amico, ca ’o vuleva bene assaie, sarria stato nu nfame se nun ce l’avesse avvertito.
D. Vito. Ma Aniello nun ’o credette… Pecchè?…
Taniello. Pecchè a stu munno scellarato sempe accussì succede… Aniello, p’ ’o troppo bene ca vuleva a Rusella, credette ca l’avevano cacciata na calunnia: e po’, essa giuraie e scongiuraie ca nun era overo…
Assunta. Puverella!…
Biase. Ve vulite fa’ nu nemico? Dicite ’a verità.
Mimì. Sì, accussì è…
Tore. E Rusella?… Pur essa puverella, c’aveva ’a fa’? Puteva cunfessà a ll’ommo ca vuleva bene tutte cose? « Io t’aggio ’ngannato»… E’ na parola!…
Gnesella. Forse sarria stato meglio… Certo, mo’ (Indica il basso di D. Amalia) nun avessemo visto stu sparpetuo.
Mimì. N’ha pigliato ’a mala salute….. Povero Aniello!
Nunziatina. Comme s’è arredutto! Mare nuie, che simmo!…
Mimì. E starrà peggio assaie. Te’, vide cca, hanno menato pure ’a paglia pe terra, pe nun fa’ sentì ’o rummore d’’e ccarrette.
