Chesta paggena è stata leggiuta.
75
miseria e nobiltà
Eug. Nce pare da la faccia! (via dietro alle donne).
Fel. E pure che bella cosa è fa lu nobele!... Rispettato, ossequiato da tutti... cerimonie, complimenti... E un’altra cosa, è la vera vita!.. Neh? lu pezzente che nce campa a fa?.. Il mondo dovrebbe essere popolato di tutti nobili... Tutti signori, tutti ricchi!.. Pezziente nun nce n’avarriene da sta!... Eh!... E se nun nce stamene pezziente, io e Pascale sarrieme muorte... Nce ha da sta la miseria e la ricchezza, se capisce!.. Ma sangue de Bacco!.. Chillo cancaro de perucchiere m’ha cumbinato alla perfezione... (mirandosi allo specchio) Pare proprio nu principe!.. Nun pozzo ridere che se ne cade lu mustaccio!.. Eh, chi sa che la sorte nun me farrà diventa quacche cosa veramente!... A la fine so’ giovene... Che nce vo’ a beni nu colpo de furtuna?... Niente!... Allora jarria truvanno a muglierema, e le diciarria: «Guarda! tu mi hai trattato in quel modo, tu non ti sei più curata di me, ed oggi sono un signore! Vuoi far pace?... Ebbene, mettiti il cappello, perchè non puoi venire con me senza cappello!... Che bella soddisfazione! Eh?... Che bella vendetta!... » Che bella paliata me facette quanno me truvaie ncoppa addò Luisella, la sarta?!... Quatte perzune nun me putevano levà da sotto a essa!... Basta!... Mo’ va trova addò sta!... Pensiamo adesso che sono un principe, e come principe posso fare quello che voglio io... Che potrei desiderare?.. Ah! un bicchiere di vermouth, tanto per stuzzicare l’appetito!.. (suona un tocco al campanello, ch’è sul tavolino).
