Chesta paggena è stata leggiuta.
40
eduardo scarpetta
Pepp. Pecchè ha fatto lu cumpare a patemo... e io le songo compariello.
Vicie. E isso t’ ha mannato ccà?
Pepp. Sissignore, ha ditto va llà, ca chella è na bona casa pe te, ncè sta Vicienzo che è amico mio stretto, parla cu chillo, e nun te n’incarricà.
Vicie. Va bene, ma fino a nu certo punto, Peppeniello mio, pecchè io nun songo lu patrone. Mò vedimmo isso che dice. Si te vò fa sta, bene, e si no che aggio «la fa?.... Te ne vaie.
Pepp. Me ne vaco? E addò vaco, neh, D. Viciè? Io me more de famma!
Vicie. (Vuie vedite chisto comme è curiuso! Da na parte me fa pure cumpassione!) Ma dimme na cosa: tu tiene mamma, tiene patre?
Pepp. Li ttengo, li ttengo, ma comme nun li ttenesse.
Vicie. E pecchè?
Pepp. Pecchè stanne cchiù disperate de me.... ’A casa mia se magna nu iuorno si, e nu iuorno no.
Vicie. Aggio capito! Ma pateto e mammeta po’ avessene da strillà che tu staie luntano da la casa, che faje lu servitore?
Pepp. A chi?!.. Chille hanno ditto: mparete n’ arte, e vattenne, pecchè nuie nun te putimmo dà a magnà.
Vicie. Ah! chesto hanno ditto? E bravo!... Vi’ che belli patre e mamme!... Va buono, Peppeniè, nun te ne incarricà, nce stongo io che penzo pe te!... Dinto a sta mappata che puorte?
Pepp. Lu vestito da servitore, che m’ ha rialato lu cumpare.
Vicie. Va bene. (Mò dico a lu patrone che chisto m’è figlio, e, o vo’ o nun bò, se l’ha da piglia pe forza)
