LO COMPARE
Trattenemiento decemo de la Jornata seconna.
Cola Jacovo Aggrancato ha no compare alivento, che se lo zuca tutto; né potenno co arteflcie o stratagemme scrastaresillo da cuollo, caccia la capo da lo sacco, e, co male parole, lo caccia da la casa.
Fu bello, veramente, lo cunto ditto co grazia, e sentuto co attenzione; de manera, che concorzero mille cose a datele zuco, perchè piacesse. Ma, perchè ogno picca de tiempo, che se metteva miezo, da cunto a cunto, teneva la schiava a la corda, e li deva li butte; però, se sollecetaje Jacova de ire a lo tuorno. La quale mese mano a la vette de lo fìlastoccole, pe refrescare lo desiderio dell’audeture, de chesta manera.
La poca descrezzione, signure, fa cadere la mezacanna da mano a lo mercante de lo jodizio, e sgarrare lo compasso all’architetto de la crianza, e perdere la vusciola a lo marinaro de la ragione. La quale piglianno radeca ne lo terreno de la gnoranzia, non procede autro frutto, che de vergogna e de scuorno; comme se vede soccedere ogne juorno; particolarmente accorse a no cierto faccetosta de compare, comme dirraggio.
Era no cierto Cola Jacovo Aggrancato de Po-
