Paggena:Lo cunto de li cunte - Tomo I.djvu/210

210

Trattenimiento VI.

lietto, e me cecina, se no essa medesema, che, senz’autro, co sto gusto, sarraggio sano nquatto pizzeche. La mamma, si be le parze no spreposeto, che l’orza avesse da fare lo cuoco e lo cammariero, e dubetaje, che lo figlio frenetecasse, puro, pe contentarelo, la fece ve- nire. La quale arrivato a lo lietto de lo prencepe, auzaje la granfa, e toccaje lo puzo de lo malato, che fece sorrejere la regina, penzanno ad ora ad ora, che l’avesse a sciccare lo naso. Ma, lo prencepe decenno all’orca: Chiappino mio, non me vuoje cocinare e dare a magnare, e Governare?, essa vasciai la capo, mostranno d’azzettare lo partito. Pe la quale cosa, la mamma fece venire na mano de galline, ed allommare lo fuoco a no focolaro drinto a la stessa cammara, e mettere acqua a bollere. E l’orza, dato de mano a na gallina, scaudatola, la spennaje destramente, e, sbentratola, parto ne mpizzaje a no spito, e parte ne fece no bello ngrattinato, che lo prencepe, che non ne poteva scennere lo zuccaro, se ne leccaje le dejeta. E, comme appe fornuto de cannariare, le deze a bevere co tanta grazia, che la regina la vozo vasare nfronte. Fatto chesso, e sciso lo prencepe a fare la preta paragone de lo jodizio de li miedece, l’orza fece subeto lo lietto; e, corzo a lo giardino, cogliette na bona mappata de rose e shiure de cetrangolo, e nce le aparpogliaje pe coppa. Tanto che la regina disse che st'orza valeva no tresoro, e ch’aveva no cantaro de ragione lo figlio de volerele bene. Ma lo prencepe, vedenno sti belle servizie, jonze esca a lo fuoco, e, se, primma, se conzomava a dramme, mo se strodeva a rotola;