Paggena:Lo cunto de li cunte - Tomo I.djvu/209

209

Jornata II.

l’apparato de sse bellizze!; leva, leva le frunne da coppa sso sportone, e famme pigliare na vista de ssi belle frutte!; auza sso portiere, e fa trasire st’aocchie a bedere la pompa de le meraviglie! Chi ha puosto a na carcere, tessuta de pile, n’opera cossi liscia?, chi ha serrato drinto no scrigno de cuojero cossi bello tesoro? Famme vedere sso mostro de grazie, e pigliate mpagamiento tutte le voglie meje; bene mio, ca lo grasso de sforza pò sdutto remmediare a l’attrazziono de niervo, ch’io tengo! Ma, dapò ditto ditto, visto ca jettava mpierdeto le parole, tornaje e schiaffarese drinto a lo lietto, e le venne accessi spotestato azzedente, che li miedece fecero male pronosteco de li fatte suoje. La mamma, che n’aveva antro bene a lo munno, sedutase a no lato de lo lietto, le disse: Figlie mio, dove nasce tanta crepantiglia?, che omore malanconeco t’è pigliato? Ta si giovane, tu sì amato, tu si granne, tu si ricco: che te manca, figlio mio? Parla: pezzente vregognuso porta la tasca vacante. Si vuoi mogliere, tu sciglie, ed io ncaparro; tu piglia, io pago. Non vide tu, ca lo male tujo è male mio? A te sbatte lo puzo, a me lo core; tu co la freve a lo sango, io co l’azzedente a lo cellevriello; n’avenno autra pontella de la vecchiezza mia, ch’a tene! Perzò, stamme allegramente, ped allegrare sto core, e non vedere negrecato sto regno, terrafinata sta casa, e carosa sta mamma! Lo prencepe, sentuto ste parole, disse: Ne sciuna cosa me pò conzolare, si no la vista dell’orza; perzò, si me volite vedere sano, facitela stare a sta cammara; né voglio, che antro me coverna, e faccia lo