Paggena:Lo cunto de li cunte - Tomo I.djvu/198

198

Trattenimiento V.

che ontare le ferite co lo sango de l’aucielle stisse, ch’avevano contato sto fatto. Grannonia, a ste parole, se ngenocchiaje nante la vorpe, pregannola a farele st’utele de pigliarele chill’auciello, pe cacciarene lo sango, che averriano spartuto da buon compagne lo guadagno. Chiano!, — disse la vorpe — , aspettammo la notte; e, comme l’aucielle s’ammasonano, lassa fare a mammata, ca saglio ncoppa a l’arvolo, e ne le scervecchio uno ped uno. Cossì, passato tutto lo juorno, mo parlanno do la bellezza do lo gio- vane, mo de l’arrore de lo patre de la zita, mo de la desgrazia soccessa, trascorrenno trascorrenno, passaje lo juorno, e la terra spase no gran cartone nigro pe raccogliere la cera da le ntorcie de la notte. La vorpe, comme vedde appapagnate l’aucielle ncoppa a li ramme, se ne sagliette guatto guatto, e, ad uno ad uno, ne piuzaje quante golane, cardille, reille, froncille, galline arcere, coccovaje, paposce, marvizze, lecere, cestarelle e pappamosche erano ncoppa all’arvole. Ed, accisole, mesero lo sango drinto a no fiaschetiello, che portava la vorpe pe ref’rescarese pe la via. Grannonia, pe lo priejo, non toccava pedo nterra; ma la vorpe le disse: Oh che allegrezza nsuonno, figlia mia! Tu non aje fatto niente, si non aje ancora lo sango mio pe fare crapiata co chillo de l’aucielle! E, ditto chesto, se mese a foire. Grannonia, che vedde derropato le speranze soje, recorse a l’arte de le femmene, ch’è l’astuzia e la losegna, decennole: Commare vorpe, averrisse ragione de sarvarete la pella, quanno io non te fosse tanto obrecata, e quanno non